Skënderbeu pritet të pësojë një revolucion në merkaton e janarit.
Si rezultat i paraqitjeve jo të mira të ekipit sidomos në fazën e dytë të kampionatit, çka solli edhe ndryshimin e trajnerit te bardhekuqtë, ekipi nuk është më i paprekshëm ndërsa priten largime dhe afrime për të balancuar skuadrën.
Pikërisht për këtë arsye duket se drejtuesit e klubit kanë filluar të bëjnë planin e ndryshimeve që do të pësojë skuadra në këtë periudhë pushimi deri në muajin janar kur do të rifillojë sezoni aktual.
Burime nga media lokale bëjnë me dije se tashmë janë larguar edhe dy futbollistët e parë. Bëhet fjalë për dy sulmuesit Etienne Tare dhe Tayo Abiodun.
Djali i futbollistit të famshëm Igli Tare, Etienne do të firmoste me Skënderbeun në merkaton e verës që lamë pas. 21-vjeçari nuk luajti më shumë se 26 minuta në 19-të javë të Superiores me fanelën e Skënderbeut, duke mos lënë asnjë gjurmë.
Ndërkohë edhe Tayo Abiodun u afrua me bujë nga klubi korçar por që merkatoja për këtë lojtar dështoi. Tayo në vijën e parë te uslmit luajti 192 minuta dhe nuk bëri asgjë nga ajo që pritej nga sulmuesi.
