Skënderbeu do të pësojë një revolucion të mirëfilltë në këtë periudhë merkatoje dhe të shumta do të jenë lëvizjet në kampin korçar.
Si rezultat i paraqitjeve jo të mira të ekipit sidomos në fazën e dytë të kampionatit, çka solli edhe ndryshimin e trajnerit te bardhekuqtë, ekipi nuk është më i paprekshëm siç ka qenë në sezonet e tjera.
Pikërisht për këtë arsye duket se drejtuesit e klubit kanë filluar të bëjnë planin e ndryshimeve që do të pësojë skuadra në këtë periudhë pushimi deri në muajin janar kur do të rifillojë sezoni aktual.
Mediat bëjnë me dije se pesë ose gjashtë lojtarë për momentin janë me “valixhet në duar” dhe një biletë vetëm vajtje për largim të menjëhershëm nga Skënderbeu.
Bëhet fjalë për një pjesë të mirë të grupit që nuk ka justifikuar besimin e dhënë nga drejtuesit për të veshur fanellën e Skënderbeut dhe që kanë pasur shumë pak minuta në dispozicion gjatë këtij gjysmë sezoni.
Pritet që largimet të shoqërohen edhe me afrime që do të jenë thuajse të njëjtat me largimet për t’i dhënë Gjokës në dispozicion një grup prej 25 lojtarësh.
