Partia Demokratike do të bllokojë pasditen e sotme disa prej akseve kryesore të Tiranës, në vijim të aksionit që e quan “mosbindje civile”.
Leja e kërkuar në Policinë e Tiranës është prej orës 17:00 deri në orën 20:00, teksa demokratët, njësoj si në protestën e kaluar pritet të bllokojnë akset si më poshtë:
- Rruga pranë godinës së Bashkisë së Tiranës
- Rreth-rrotullimi i “Zogut të Zi”
- Rreth-rrotullimi tek sheshi “Wilson”
- Rreth-rrotullimi tek Pallati me Shigjeta, pjesa e Rrugës së Kavajës
- Kryqëzimi tek “Rruga e Elbasanit”, ura pranë xhamisë së “Namazgjasë”.
Në tubimin e sotëm pritet të marrë pjesë dhe kreu i PD-së, Sali Berisha, prezenca e tij e parë në një protestë që pas lirimit nga masa e “arrestit shtëpiak”. Demokratët kanë deklaruar se nuk do të tërhiqen nga protestat deri në plotësimin e kërkesës së tyre për Qeveri teknike para zgjedhjeve parlamentare të 11 Majit 2025.
Policia e Tiranës përmes një komunikate bëri me dije se garanton të drejtën për tubim, por pa cenuar lëvizjen e lirë të qytetarëve dhe të automjeteve.
“Nisur nga objekti i kërkesës së bërë për zhvillimin e tubimeve në disa akse rrugore në qytetin e Tiranës, Policia e Tiranës i ka kthyer përgjigje organizatorëve se merr përsipër garantimin e tubimeve që nuk bllokojnë lëvizjen e lirë të automjeteve dhe qytetarëve.” – thuhej në njoftim.
Uniformat blu paralajmërojnë se bllokimi i akseve rrugore është vepër penale dhe se kush ndërmerr akte të tilla do të përballet me pasojat.
Gjithsesi, Policia deklaroi se ka ndërmarrë masa që në rast bllokimi të akseve të mësipërme, të devijojë qarkullimin e automjeteve në rrugë alternative.
