Pavarësisht se në futboll thuajse gjithçka është e mundur dhe e lejueshme, titulli kampion në Shqipëri duket një çështje e mbyllur prej kohësh, pavarësisht rezultateve negative të Skënderbeut kryesues në ditët e fundit.
Një humbje ndaj Kukësit në Korçë, atje ku ishte përgatitur festa e titullit kampion dhe për të përfunduar me një përmbysje në Laç, teksa korçarët ishin në avantazhin e dy golave, dëshmojnë formën negative të ekipit të Dajës. Në një intervistë për “Supersport”, presidenti i ekipit të Skënderbeut, Ardjan Takaj ka pasqyruar situatën që po kalon klubi i tij dhe ka konfirmuar Dajën në stolin e skuadrës. “Në ndeshjen me Kukësin ne duhet të ishim shpallur kampion. Titulli është thuajse i hipotekuar nga Skënderbeu, sezoni është i lodhshëm dhe ky problem i reflektuar edhe në ekipin tonë është i kuptueshëm, fundja nuk na ndodh vetëm ne. Kjo ndodh edhe në shumë ekipe të tjera europiane. Mund të them se ishte e nevojshme mbledhja me ekipin, sepse është i nevojshëm motivimi i skuadrës. Ne i kemi kërkuar ekipit që të bëj të pamundur për t’u shpallur kampion këtë javë. Tashmë duhet të reflektojmë për rezultatet e fundi”,-u shpreh numri një i korçarëve, që më pas preku dhe argumentin e nervozizmit të Ilir Dajës.
“Daja ka besimin tim të plotë. Deklaratat e tij pas ndeshjes ishin çaste nervozizmi pasi kërkon ta mbylli sa më shpejtë historinë e titullit kampion, duke parë karakterin e këtij kampionati. Kjo ka ndodhur edhe për shkak të dy rezultateve të fundit të Skënderbeut, sepse tifozët ishin përgatitur për festë ndaj Kukësit. Korçarëve po u preke festën, i ke prekur aty ku nuk mbanë më, pasi ne shquhemi për festa. Kampionatin e kemi në dorën tonë do të shohim vetëm veten tonë, pa u marrë shumë me rezultatet e ekipeve të tjera. Jemi në një sezon ku kemi arritur shumë në fushën e blertë, pasi jemi edhe në finalen e Kupës. Federata e ka si rregull që Kupën e jep vetëm në ndeshjen e fundit, pasi të ketë mbaruar gjithçka dhe për ne ajo do të jetë dita e festës,” deklaroi presidenti i klubit korçar.
Në fund dy fjalë dhe për çështjen më të nxehtë, dënimin 10-vjeçar të Skënderbeut. Takaj rikonfirmon se nga organet juridike të UEFA-s nuk pristye asgjë dhe se beteja e madhe është në KAS. “Nuk ishte surprizë për ne vendimi i Apelit, pasi ishim përgatitur, por kjo dha ndikimet e veta edhe te skuadra. Tashmë jemi duke u përgatitur shumë për në KAS dhe atje shkojmë vetëm për pafajësi, për asnjë vendim tjetër. Mund të them se janë të tjerë ata që merren më çështjen ligjore të Skënderbeut dhe të tjerë ata që merren me merkaton. Kemi shumë lojtarë të huazuar në Kosovë dhe Maqedoni. Na është larguar Abazaj nga merkato e janarit, por kemi ende Bregun. Unë nuk e mendoj kurrë largimin nga Skënderbeu”, është shprehur Takaj.
