Ecuria e prodhimit, punësimit dhe shitjeve nuk ka qenë e mirë për sektorët e industrisë dhe energjisë elektrike, ndërsa sektori i ndërtimit ka vijuar të performojë pozitivisht në tremujorin e tretë të vitit 2024, sipas statistikave afatshkurtra të INSTAT.
Industria, prodhimi me rënie, papunësia në rritje
Sektori i industrisë pati një ecuri negative në të gjithë treguesit në tremujorin e tretë të vitit 2024 raportoi INSTAT, si rrjedhojë e krizës së shumëfishtë që po përjeton ky sektor nga rënia e euros dhe kërkesa më e ulët në tregjet ndërkombëtare.
Indeksi i shitjeve neto në volum shënoi rënie 2,8%, krahasuar me të njëjtën periudhë të një viti më parë.
Indeksi i prodhimit në volum shënoi rënie 4,6%, krahasuar me të njëjtën periudhë të një viti më parë.
Indeksi i numrit të të punësuarve shënoi rënie vjetore 5,5% dhe indeksi i fondit të pagave shënoi rritje 1,2%, krahasuar me të njëjtën periudhë të një viti më parë.
Energjia, prodhimi dhe punësimi me rënie
Sektori i energjisë ka shënuar rënie të volumit të prodhimit dhe rritje të papunësisë gjithashtu. Sipas INSTAT, indeksi i shitjeve neto në volum shënoi rënie 7,3% në tremujorin e tretë të vitit 2024, krahasuar me të njëjtën periudhë të një viti më parë.
Indeksi i prodhimit në volum shënoi rënie vjetore me 5,4%, ndërsa indeksi i numrit të të punësuarve shënoi rënie 5,8%. Nga ana tjetër, indeksi i fondit të pagave shënoi rritje 9,2%, krahasuar me të njëjtën periudhë të një viti më parë.
Në aktivitetet e furnizimit me ujë, trajtimit dhe menaxhimit të mbetjeve indeksi i shitjeve neto në volum shënoi rritje 8,5%, krahasuar me të njëjtën periudhë të një viti më parë. Indeksi i prodhimit në volum shënoi rritje 8,1%, krahasuar me të njëjtën periudhë të një viti më parë.
Indeksi i numrit të të punësuarve shënoi rënie 1,2%, krahasuar me të njëjtën periudhë të një viti më parë dhe indeksi i fondit të pagave shënoi rritje 5,6%, krahasuar me 2023.
Ndërtimi, rritet prodhimi dhe shitjet
Indekset e treguesve në aktivitetin Ndërtim, në tremujorin e tretë 2024 tregojnë rritje. Sipas INSTAT, indeksi i shitjeve neto në volum shënoi rritje 9,1%, krahasuar me të njëjtën periudhë të një viti më pare dhe indeksi i prodhimit në volum u rrit me 5,6%.
Indeksi i numrit të të punësuarve shënoi rritje 1,1%, krahasuar me të njëjtën periudhë të një viti më parë dhe fondi i pagave shënoi rritje 9,7%./ Monitor.al
