Juventus vijon sezonin me ulje ngritje të forta, “X” kundër Venezia-s është pasqyra më e qartë, një barazim 2-2 që “djeg” jo pak. “Zonja e Vjetër” ishte një nga ekipet më aktive përpara këtij sezoni, gjatë merkatos së verës, por me sa duket drejtuesit e klubit nuk kanë ndërmend të ndalen duke parë edhe emergjencën e madhe të dëmtimeve që vijon t’i shoqërojë.
Pas Ismajlit, një pistë që me sa duket ka rëndë, pasi qendërmbrojtësi kuqezi ka zgjedhur Napolin për të vijuar karrierën, Juventus ka kthyer vështrimin nga një tjetër futbollist shqiptar, bëhet fjalë për Cristian Shpendin.
Sipas TuttoSport: Juventus kërkon një profil të ri për fazën sulmues, një alternativë të re për Dusan Vlahovic. Gjithnjë sipas të përditshmes torinez, ideja e drejtuesve të Juves është të sigurojnë që në janar shërbimet e Shpendit, por do t’i bashkohet grupit vetëm në përfundim të sezonit.
Me këtë lëvizje, Juventus kërkon të “djeg” konkurrencën e madhe që ka për Shpendin. Sulmuesi kuqezi po kalonte një moment të mirë përpara se të dëmtohej pasi udhëheq listën e golashënuesve më të mirë në Serie B në kuotën e 10 golave.
