Një autoblind ku udhëtonin 8 efektivë policie është aksidentuar mbrëmjen e djeshme në fshatin Grabovc, afër Zveçanit, në veri të Kosovës.
Mediat vendase raportojnë se blindi i Policisë së Kosovës ka rënë nga ura dhe 8 efektivët kanë mbetur të plagosur si pasojë e aksidentit.
“Mund të konfirmojmë se pak pas orës 20:00, është raportuar se në veri të vendit, konkretisht në Fshatin Grabovc, një veturë zyrtare e blinduar në të cilën kanë qenë tetë operatorë, dyshohet se ka rrëshqitur dhe ka dalë jashtë rrugës. Menjëherë në vendin e ngjarjes kanë dalur njësitet kompetente policore për tu marrë me rastin, e po ashtu janë njoftuar edhe ekipet mjekësore me autoambulanca. Si pasojë e aksidentit zyrtarët policorë kanë pësuar lëndime, dhe të njejtit nga ekipet mjekësore janë dërguar në qendrën spitalore për trajtim të mëtejmë mjekësor.” – thuhet në njoftimin e Policisë së Kosovës.
Laura Nushi, drejtoreshë e Spitalit të Mitrovicës, ka bërë të ditur se policët e lënduar janë jashtë rrezikut për jetë.
“Ekipet kujdestare janë mobilizuar dhe është aktivizuar shtabi emergjent dhe kanë reaguar në një veprim të menjëhershëm. Pas ekzaminimeve të bëra, gjendja e të gjithë zyrtarëve policorë mund të themi se është stabël dhe jashtë rrezikut për jetën. Për ekzaminime shtesë janë dërguar tre prej tyre në QKUK e pesë të tjerë janë dërguar për në shtëpi.”, ka thënë ajo.
