Mesditën e kësaj të premte është hedhur në Zyrih të Zvicrës shorti për kualifikueset e kampionatit botëror të vitit 2026, ku Shqipëria dhe shtetet e tjera europiane janë njohur me kundërshtarët etyre
Kuqezinjtë tanë do të jenë pjesë e Grupit K, i cili mund të konsiderohet si një grup “ferri” për ne, pasi do të përballemi me Anglinë, si edhe me Serbinë. Grupi përbehet me 5 ekipe, teksa dy kundërshtarët e tjerë janë Letonia dhe Andorra.
“Tre Luanët” i rigjejmë në grup, pasi ekipi ynë është përballur edhe gjashtë herë të tjera me Anglinë, duke pësuar po kaq humbje.
Serbia na rikthen kujtimet e 14 tetorit të vitit 2014, ku flamuri “AUTOCHTHONOUS” u ngrit me dron në mes të Beogradit, në duelin mes dy ekipeve të vlefshëm për kuaiflikueset e kampionatit europian. Kuqiznjtë u dhunuan nga tifozët, duke mos pranuar më të dalin në fushë dhe më pas Shqipëria fitoi 3 pikët në CAS, gjë që na dha një dorë për t’u kualifikuar për herë të parë në një Europian, ai i “Francë 2016”.
Nisur nga kjo ngjarje, dueli kundër Serbisë do të jetë më shumë se një ndeshje futbolli, me skuadrat që do përballen 11 vite pas incidentit në Beograd.
Kundër Serbisë, kombëtarja shqiptare ka luajtur në dy raste. Fitorja 0-3 në tavolinë në 14 tetorin e 2014 dhe humbja 0-2 në datën 8 tetor 2015 në “Elbasan Arena”.
Sa i përket Letonisë, Shqipëria asnjëherë nuk ka fituar përballë saj. Janë pesë ndeshje në total mes dy ekipeve, të gjitha të përfunduara në barazim nga viti 1992 dhe deri në vitin 1999. Gjashtë gola të shënuar dhe po aq të pësuar. Dy takime janë mbyllur në barazim pa gola.
Në anën tjetër statistikat i buzëqeshin Shqipërisë përballë Andorrës. Kjo pasi janë fituar pesë nga shtatë takime. Vetëm një miqësore e vitit 2002 është humbur, teksa një përballje është mbyllur barazim.
Letonia dhe Andorra janë dy rivalë që gjenden poshtë nesh në renditjen e UEFA-s dhe do jetë detyrim për Shqipërinë që të marrë maksimumin në të katërta ndeshjet, nëse dëshiron të tentojë kualifikimin.
Rrugëtimi në grup për Shqipërinë do të nisë në mars dhe do të mbyllet në nëntor. Kjo pasi kuqezinjtë janë në një grup me pesë skuadra. Në rast se do të ishin me katër, atëherë gjithçka do të fillonte prej shtatorit të vitit të ardhshëm.
Shorti u tregua më bujar me Kosovën, e cila ka rigjetur një kontingjent lojtarësh me origjinë shqiptare që luajnë për kombëtaren helvete, si Granit Xhaka dhe Ardon Jashari. Ajo do të jetë pjesë e Grupit B, një grup me 4 ekipe, ku përveç Zvicrës, janë edhe Suedia dhe Sllovenia
Kujtojmë se në Botërorin që do të mbahet në vitin 2026 do të jenë 16 kombëtare që do të marrin pjesë nga Europa, tre më shumë se herët e tjera.
Janë 12 grupe në total për kualifikueset, ku 6 prej tyre janë me nga 4 ekipe, ndërsa 6 grupe të tjerë me nga 5 ekipe dhe do të sfidojnë njëra-tjetrën për të marrë pjesë në kampionatin botëror që do të mbahet në Amerikë, Kanada dhe Meksikë.
SHORTI
GRUPI A,
Fituesi Gjermani-Itali,
Sllovaki,
Irlandë e Veriut,
Luksemburgu
GRUPI B,
Zvicër,
Suedi,
Slloveni,
Kosovë
GRUPI C,
Humbësi Portugali-Danimarkë,
Greqi,
Skoci,
Bjellorusi
GRUPI D,
Fituesi Francë-Kroaci,
Ukraina,
Islandë,
Azerbajxhan
GRUPI E,
Fituesi Spanjë-Holandë,
Turqi,
Gjeorgji,
Bullgari
GRUPI F,
Fituesi i Portugali-Danimarkë,
Hungari,
Irlandë,
Armeni
GRUPI G,
Humbësi Spanjë-Holandë,
Poloni,
Finlandë,
Lituani,
Maltë
GRUPI H,
Austri,
Rumani,
Bosnje & Hercegovinë,
Qipro,
San Marino
GRUPI I,
Humbësi Gjermani-Itali,
Norvegji,
Izrael,
Estoni,
Moldavi
GRUPI J,
Belgjikë,
Uells,
Maqedoni e Veriut,
Kazakistan,
Lihtenshtein
GRUPI K,
Angli,
Serbi,
SHQIPËRI,
Letoni,
Andorra
GRUPI L,
Humbësi i Francë-Kroaci,
Republika Çeke,
Mali i Zi,
Ishujt Faroe,
Gjibraltar
