Sami Khedira, ish-mesfushori gjerman që ka luajtur për Real Madridin nga viti 2010 deri më 2015, e ka kujtuar me shumë respekt trajnerin e tij të atëhershëm, José Mourinho.
Në një intervistë për “Marca”, Khedira e cilësoi Jose një lider të jashtëzakonshëm dhe të paimitueshëm.
“Mourinho është një lider unik. Të jesh lider është stil jete dhe nuk mund të kopjohet. Nuk mund të kopjosh Mourinhon, Guardiolën, Klopp-in apo Ancelottin, – tha Khedira. – Mund të marrësh shënime nga ajo që bëjnë për t’u përmirësuar, por në fund duhet të jesh vetvetja për të pasur lidership të natyrshëm”.
Ndeshjet kundër Barcelonës së Messit, Iniesta dhe të tjerëve ishin sfida të mëdha, edhe për Real Madridin e atyre viteve. Sidoqoftë, skuadra e udhëhequr nga Mourinho kishte një mentalitet luftarak, siç shpjegon Khedira:
“Kur filluam në vitin 2010, Barcelona ishte më e fortë. Brenda një ose dy vitesh, ne e eliminuam atë diferencë. Barça ishte më teknike, por ne kishim një mentalitet dhe disiplinë taktike…, ishim luftëtarë në fushë. Në çdo ndeshje ndiheshim si gladiatorët në Romë…”
Khedira thekson ndikimin e Mourinhos në krijimin e kësaj atmosfere: “Mou ishte gjeni në këto ndeshje. Përgatitja e tij ishte fantastike. Padyshim, obsesioni i madh ishte të ndalohej Messi. Në fakt, ai obsesion ishte i të gjithëve, jo vetëm i Mourinhos. Kjo krijoi një atmosferë të jashtëzakonshme para ndeshjeve. Ne e dinim se duhej të jepnim më shumë se 100%”.
Në përfundim të intervistës, Khedira zbuloi se lojtari i tij i preferuar nuk ishte Cristiano Ronaldo, por Mesut Özil te Real Madridi: “Lojtari më i veçantë për mua ka qenë Mesut Özil. Dhe kjo u vërtetua me largimin e tij. Ditën që Mesut u largua, të gjithë i thoshim Florentinos: Pse po e shet?!”
