Pesë persona kanë humbur jetën si pasojë e një shpërthimi në një bllok apartamentesh në qytetin bregdetar të Holandës, Hagë. Shërbimet e urgjencës kanë bërë të ditur se katër persona janë shpëtuar nga rrënojat, ndërsa vijojnë ende kërkimet për të tjerë që mund të kenë mbetur brenda tyre.
Kryebashkiaku Jan van Zanen tha se operacioni i kërkim-shpëtimit është fokusuar në shpëtimin e jetëve të njerëzve. “Nuk dihet se sa njerëz janë ende nën rrënoja. Por realiteti është se ata kanë vetëm një shans të vogël për të mbijetuar,” tha ai në një konferencë për shtyp.
“Hetimi për shkakun e shpërthimit dhe zjarrit të mëvonshëm filloi menjëherë. Detektivët janë në vend për të siguruar provat e mundshme. Policia tani u ka bërë thirrje edhe dëshmitarëve okularë të dalin përpara”, theksoi ai më tej.
Shkak për shpërthimin nuk dihet ende se kush mund yë jetë bërë, por policia po kërkon një automjet që është parë duke u larguar nga vendi i ngjarjes me shpejtësi. Autoritetet thanë gjithashtu se nga shpërthimi u shkatërruan pesë apartamente, ndërsa 40 banesa fqinje janë evakuuar.
Një ekip i specializuar urban i kërkim-shpëtimit është vendosur në vendngjarje, me katër qen të trajnuar për të gjetur viktimat. I njëjti ekip u përdor më parë në Turqi pas tërmeteve të dyfishta shkatërruese që goditën jugun në fillim të vitit 2023, duke vrarë të paktën 59,000 njerëz.
