Rebelët sirianë kanë marrë kontrollin e Damaskut dhe kanë njoftuar mëngjesin e sotëm se kanë rrëzuar qeverinë e Bashar al-Assad, i cili sundoi Sirinë për gati 25 vjet.
Megjithatë, aktualisht është e paqartë se ku ndodhet Assad, i cili nuk ka folur në publik që nga avancimi i papritur i rebelëve një javë më parë, kur kryengritësit pushtuan Aleppon verior në një sulm të befasishëm përpara se të marshonin në një sërë qytetesh ndërsa vijat e frontit u shkatërruan.
Ka raportime se udhëheqësi i rrëzuar nga pushteti u fluturoi me avion nga Damasku. Agjencia e lajmeve Reuters thotë se dy zyrtarë të lartë të ushtrisë pretendojnë se Assad fluturoi të dielën nga kryeqyteti në drejt një destinacioni tjetër, që mbetet ende i panjohur.
Ministri i Jashtëm i Turqisë sugjeron se Assad ka të ngjarë të jetë jashtë vendit tani, por nuk ka zbuluar vendndodhjen.
Në mënyrë të ngjashme, një diplomat i lartë nga Emiratet e Bashkuara Arabe as nuk i ka konfirmuar dhe as i ka mohuar pretendimet që Assad ka kërkuar strehim në Abu Dhabi.
Ndërkohë, një avion i Sirisë Air u ngrit nga aeroporti i Damaskut rreth kohës kur kryeqyteti u raportua se ishte marrë nga rebelët, sipas të dhënave nga faqja e internetit Flightradar.
Avioni fillimisht fluturoi drejt rajonit bregdetar të Sirisë, një bastion i sektit alavit të Asadit, por më pas bëri një kthesë të papritur dhe fluturoi në drejtim të kundërt për disa minuta përpara se të zhdukej nga harta, shkruan Reuters. Megjithatë, Reuters shkruan se nuk mundi të zbulonte menjëherë se kush ishte në bord.
Por dy burime siriane thanë se ekzistonte një probabilitet shumë i lartë që Assad mund të ishte vrarë në një përplasje aeroplani pasi ishte një mister pse aeroplani mori një kthesë të papritur dhe u zhduk nga harta sipas të dhënave nga faqja e internetit Flightradar.
“Ai u zhduk nga radari, ndoshta transponderi ishte fikur, por besoj se probabiliteti më i madh është që aeroplani të jetë rrëzuar…”, citohet të ketë thënë një burim sirian pa dhënë detaje.
Ndërsa avancimi i rebelëve mori hov gjatë javës së kaluar, pati spekulime se ai mund të kërkonte strehim në Moskë ose te aleati tjetër i tij kryesor, Irani.
Qytetet kryesore të Sirisë tanimë janë nën kontrollin e plotë të forcave rebele. Mes qyteteteve të pushtuara janë Damasku, si dhe qytetet e tjera më të mëdha të Sirisë si Alepo, Homs, si dhe qyteti më i madh në Lindje të vendit Deir al-Zour.
Mediat ndërkombëtare raportojnë se situata në Damask aktualisht paraqitet relativisht e qetë. Ndërkaq raportohet për të shtëna armësh si dhe festime nga rebelët dhe mbështetësit e tyre. Në rrugët e qytetit qarkullojnë automjetet, ndërkohë që dyqanet janë mbyllur.
