Policia e Vlorës në bashkëpunim me Prokurorinë ka zbardhur grabitjen nën kërcënimin e një pistolete lodër më 6 Dhjetor të këtij viti, të një banesë të marrë me qira nga një kolumbiane dhe një venezueliane.
Si rezultat i hetimeve, janë arrestuar tre autorët e dyshuar të kësaj ngjarje. Në kuadër të operacionit policor të koduar “Breaking” janë vënë në pranga shtetasit: Altin Toto, 39 vjeç, Klajdi Bani, 41 vjeç (i dënuar për vrasje në shtetin grek) dhe Orland Plepi, 33 vjeç, të tre banues në Vlorë.
“Shtetasit Altin Toto dhe Klajdi Bani, në bashkëpunim me njëri-tjetrin, dyshohen se më datë 6 Dhjetor 2024 kanë hyrë me forcë në banesën e marrë me qira, në lagjen “1Maji”, nga dy shtetase të huaja (njëra kolumbiane dhe tjetra venezueliane) dhe, nën kërcënimin e një sendi pistoletë lodër, u kanë vjedhur një shumë prej 500 eurosh, një aparati celular Samsung dhe një dokument udhëtimi.
Dy autorët dyshohet se janë ndihmuar më pas, nga shtetasi Orland Plepi për t’u larguar nga qyteti i Vlorës drejt Tiranës me një automjet tip “Audi”, me qëllim fshehjen nga kontrollet e Policisë. Në momentin e arrestimit, gjatë kontrollit fizik të ushtruar ndaj shtetasit Orland Plepi, shërbimet e Policisë i kanë gjetur një sasi lënde narkotike kanabisi.” – thuhet në njoftimin e bluve të qytetit bregdetar.
Uniformat blu kanë sekuestruar gjatë operacionit: një send pistoletë lodër, veshje dhe një automjet tip “Range Rover”, të përdorura nga autorët gjatë kryerjes së krimit, një shumë parash prej 440 euro dhe dokumenti i udhëtimit të vjedhur prej tyre, një automjet tjetër tip “Audi”, një sasi lënde narkotike kanabisi dhe 7 celularë.
Materialet procedurale i kaluan Prokurorisë së Vlorës për veprime të mëtejshme.
