Policia e Korçës ka arrestuar personin e shpallur në kërkim në kuadër të operacionit për zbulimin e magazinës së kanabisit në fshatin Voskop më 24 Tetor të këtij viti.
Në pranga është vënë shtetasi Santilano Duçin, 38 vjeç, banues në fshatin Voskop, i cili akuzohet si organizatori i kësaj veprimtarie kriminale.
Gjykata e Korçës i ka caktuar masën e sigurisë “Arrest në burg” 38-vjeçarit për veprat penale “Prodhimi dhe shitja e narkotikëve” dhe “Kultivimi i bimëve narkotike”.
Gjatë kontrollit në banesën e tij në muajin tetor, uniformat blu gjetën të kultivuara dy bimë narkotike, si dhe sasi të vogla të lëndëve narkotike kokainë dhe kanabis.
Kujtojmë se në magazinën në perfieri të fshatit Voskop në pronësi të Andon Demirsha, Policia gjeti 195 kg lëndë narkotike kanabis sativa (bimë në proces tharjeje) dhe pajisje që shërbenin për tharjen dhe përgatitjen e lëndës narkotike për shitje.
Në kuadër të operacionit të koduar “Voskopi”, uniformat blu sekuestruan edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
Në atë kohë, veç pronarit të magazinës Andon Demirsha, u arrestuan dhe shtetasit Gentian Gurin nga Tirana, Anesti Brudan nga fshati Bulgarec dhe Redion Hamitajn nga Cërriku.
Dyshohet se kanabisi në magazinë në fshatin Voskop është sjellë nga një tjetër zonë, jashtë Qarkut të Korçës.
