SPAK: Suel Çela trafikonte drogë nga Ekuadori. Ja ngjarjet e zbardhura dhe roli i gazetarëve

Prokuroria e Posaçme ka dalë me një komunikatë zyrtare në lidhje me operacionin për goditjen e grupit kriminal të Suel Çelës, mbi të cilin sipas SPAK rëndojnë akuzat për veprat penale nga trafiku ndërkombëtar i lëndeve narkotike, tek korrupsioni e deri tek vrasjet e kundërshtarëve të tij.

SPAK ka caktuar gjithësej 21 masa sigurie, 18 prej tyre “Arrest me burg”, për një avokate “Arrest shtëpie” dhe “detyrim paraqitje” për dy gazetarë, por në njoftim nuk theksohet se sa prej tyre janë ekzektuar nga ana e Policisë së Shtetit.

SPAK bën me dije se ka zbardhur atentatin ndaj Ardian Çapja, vrasjen e Bledar Muçës në Belgjikë, si dhe një atentat të dështuar ndaj Elton Kilës, teksa sqarohet dhe roli që kanë patur dy gazetarët Artan Hoxha dhe Elton Qyno.

Në lidhje me këtë operacion, SPAK bën me dije se ka bashkëpunuar me Eurojust, Europol, autoritetet e drejtësisë së Francës, Belgjikës, Holandës dhe Ekuadorit për të dokumentuar dhe ndjekur penalisht një organizatë të mirëstrukturuar kriminale në trafikun ndërkombëtar të kokainës, me bazë në qytetin e Elbasanit dhe me shtrirje në vendet e Bashkimit Europian dhe Amerikës Latine.

Sipas SPAK, ky hetim i bazuar në  komunikimet e koduara  SKY/ECC dhe në veprimet të tjera hetimore vijon edhe për dokumentimin e veprimtarisë kriminale për persona të tjerë.

Struktura e Organizatës 

“Kjo organizatë kriminale, në fokusin e saj kishte kontrollin e territorit, kryesisht në Shqipërinë e Mesme, duke përdorur mekanizma të ndryshëm si dhe dhunë të vazhdueshme ndaj grupeve rivale kriminale. Organizata kriminale që drejtohej nga Marjus Lulaj alias Suel Çela me qëllim kontrollin e territorit  kishte si synim kryesor eleminimin fizik të anëtarëve të një grupi tjetër të strukturuar kriminal i cili vepronte po në qytetin e Elbasanit dhe që konsiderohej si kundërshtar i organizatës kriminale që drejtohej nga Marjus Lulaj alias Suel Çela. I gjithë aktivitetit financohej nga paratë që përfitoheshin nga aktiviteti kriminal i trafikimit të lëndëve narkotike nga Amerika Latine drejt vendeve si; Gjermania, Mbretëria e Bashkuar, Italia, Belgjika dhe Holanda.” – thuhet në njoftimin e SPAK.

Gjatë hetimit të këtij procedimi penal nr.193/2023 janë dokumentuar faktet penale si më poshtë:

1. Vrasje e mbetur në tentativë me snajper në dëm të shtetasit, Ardian Çapja, në datën 08.06.2020 në qytetin e Elbasanit
2. Sigurimi i kushteve dhe mjeteve materiale për kryerjen e vrasjes në dëm të shtetasit Bledar Muça, mars 2020;
3. Sigurimi i kushteve dhe mjeteve materiale për kryerjen e vrasjes në dëm të shtetasit Elton Kila, në vitin 2020.
4. Tentativa për trafikimin e afërsisht 930 kg të lëndës narkotike, lloji kokainë nga Ekuadori në Europë, në dhjetor 2020.
5. Tentativa për trafikimin e 466 kg të lëndës narkotike, lloji kokainë nga Ekuadori në Holandë, në janar 2021.
6. Ushtrimi i ndikimit përmes akteve korruptive në segmente të caktuara të sistemit të drejtësisë, policisë së shtetit dhe medias.

Sipas SPAK, Marjus Lulaj alias Suel Çela është identifikuar si drejtuesi i organizatës, përgjegjës për menaxhimin dhe koordinimin e aktiviteteve kriminale, përfshirë vrasjet, trafikimin ndërkombëtar të drogës, kryerjen e veprimeve korruptive dhe organizimin e skemave të pastrimit të parave. Ndërkohë disa nga anëtarët me role kyçe si; Mario Çela, Fuad Verzivolli, Bujar Shega, Klaus Matishi alias  Kledjan Çopja, Xhino Roka etj ishin pjesë operative e organizatës, të angazhuar në planifikimin dhe ekzekutimin e veprave të rënda penale, përfshirë vrasje me paramendim dhe trafikun e narkotikëve.

Roli i personave të tjerë

Organizata kishte arritur të korruptonte funksionarë të policisë së shtetit (Dedan Gjoni) dhe të sistemit gjyqësor (Pajtime Fetahu) të cilët duke shfrytëzuar pozicionin e tyre zyrtar e ndihmonin organizatën me informacione, duke ofruar gjithashtu lehtësira dhe ndikime në sistemin gjyqësor në këmbim të favoreve dhe përfitimeve materiale. Organizata kriminale kishte aftësi që të ndikonte dhe të korruptonte përfaqësues të sistemit të drejtësisë me qëllim që këta të fundit të lehtësonin pozitën e drejtuesit Marjus Lulaj alias Suel Çela dhe anëtarëve të tjerë të organizatës në proceset penale në ngarkim të tyre. Për t’u theksuar është aftësia e organizatës që të ndikojë tek trupa gjyqësore me qëllim që të rëndohej pozita apo masa e dënimit që do te jepej në ngarkim të anëtarëve të grupit kriminal që konsideroheshin si kundërshtarë të tyre.

Marjus Lulaj alias Suel Çela ka synuar të manipulojë perceptimin publik, duke i paraqitur rivalët e tij si të paprekshëm për shkak të lidhjeve të dyshuara që ata mund të kenë me politikën. Trysnia për hetime pasurore në kuadër të OFL-së dhe nxitja e mediave për të marrë dëshmi nga individë që mund të inkriminojnë rivalët e tij do të krijonin, sipas tij, në opinionin publik perceptimin se këta rivalë, për shkak të lidhjeve të dyshuara politike, janë bërë “të paprekshëm”. Kjo strategji, e cila përfshin manipulimin e informacionit dhe ndikimin në opinionin publik, jo vetëm që do të rriste pozitat e tij, dhe në të njëjten kohë do të dëmtonte interesat e rivalëve.

Dyshohet se këto synime i ka realizuar përmes bashkëpunimit me gazetarët Artan Hoxha dhe Elton Qyno, të cilët kundrejt përfitimeve monetare të paligjshme kanë mbajtur qëndrime në media, si dhe kanë publikuar artikuj dhe video që keqinformonin dhe manipulonin opinionin publik.

Rrjeti i trafikut ndërkombëtar të kokainës

Organizata ka zbatuar një skemë komplekse të mbyllur të trafikut të kokainës nga Amerika Latine drejt vendeve të Europës duke bashkuar me grupe të ndryshme kriminale me lidhje të forta në Amerikën Latine. Organizata e porosiste lëndën narkotike nga grupe të strukturuara kriminale shqiptare të lidhur me grupe kriminale vendase në Amerikën Latinen.

Më pas, sasia e lëndës narkotike transportohej e fshehur në produkte të ligjshme dhe tranzitohej në disa porte europiane me destinacion shtetet si; Gjermania, Mbretëria e Bashkuar, Italia, Belgjika dhe Holanda, nga ku nxirrej, trafikohej dhe shitej me shumicë nga anëtarët e organizatës drejt tregun europian i narkotikëve. Pjesa më e madhe e ngarkesave lëvizte me kontejnerë në porte të mëdha si Antverp,  Roterdam etj., të cilët shpesh shërbenin si pika kyçe për trafikun e saj në tregun evropian. Gjithashtu ka pasur tentativa për të kryer transport të lëndëve narkotike përmes aeroporteve të Belgjikës dhe Holandës.

Një pjesë e të ardhurave nga ky aktivitet kriminal investohej:

a. Në blerjen e lëndës narkotike
b. Në gjendje cash-i në Shqipëri
c. Në biznese në dukje të rregullt
d. Për të mbështetur infrastrukturën operative të organizatës dhe blerje influence në segmente të veçanta të sistemit të drejtësisë, policisë, medias dhe biznesit

Masat e sigurimit janë dhënë për personat e mëposhtëm:

1. Marjus Lulaj alias Suel Çela –  36 vjeç, banues në Elbasan
2. Mario Çela – 35 vjeç, banues në Elbasan (vëllai i Suel Çelës)
3. Xhino Roka – 33 vjeç, banues në Tiranë
4. Klaus Matishi alias Klaus Çopja alias Kledjan Çopja – 37, banues në Elbasan
5. Sergej Hasanpapaj – 30 vjeç, banues në Elbasan
6. Bruno Hazizolli – 34 vjeç, banues në Elbasan
7. Ledio Zabeli – 33 vjeç, banues në Elbasan
8. Marsel Roka – 37 vjeç, banues në Tiranë
9. Ado Xhika alias Elkier Cërriku alias Ado Cërriku –  39 vjeç, banues në Tiranë
10. Prekë Kodra – 48 vjeç, banues në Malësinë e Madhe
11. Fuad Verzivolli –  48 vjeç, banues në Elbasan
12. Metin Mehjam – 27 vjeç, banues në Elbasan
13. Renato Hasani – 35 vjeç, banues në Elbasan
14. Skënder Sufaj – 34 vjeç, banues në Tiranë
15. Artan Hoxha – 50 vjeç, banues në Tiranë
16. Elton Qyno – 39 vjeç, banues në Tiranë
17. Pajtime Fetahu – 65 vjeç, banues në Elbasan (Ish-gjyqtare në Gjykatën e Elbasanit)
18. Dedan Gjoni – 48 vjeç, banues në Tiranë  (Ish-shefi i Krimeve në Komisariatin nr. 6 në Tiranë)
19. Marsel Shega alias Bujar Shega – 51 vjeç, banues në Tiranë (Biznesmen)
20. Hajdar Lala alias Hajdar Xaka alias Hajdar Sefa – 40 vjeç, banues në Tiranë
21. Blerina Beqiri –  39 vjeç, banues në Elbasan (Avokate)

Veprat penale të dyshuara:

1. “Vrasje me paramendim”, e mbetur në tentativë, në dëm të A.Ç, ngjarje e ndodhur në datën 08.06.2020;
2. “Sigurimi i kushteve dhe i mjeteve materiale për të kryer vrasje në dëm të E. K. dhe B.M.
3. “Mbajtja pa leje dhe prodhimi i armëve, armëve shpërthyese dhe municionit”, kryer në formë të veçantë të bashkëpunimit, atë të organizatës kriminale, “Organizata kriminale” dhe “Kryerja e veprave penale nga organizata kriminale dhe grupi i strukturuar kriminal”.
4. “Trafikimi i narkotikëve”, kryer në formë të veçantë të bashkëpunimit atë të grupit të strukturuar kriminal”.
5. “Grup i strukturuar kriminal”.
6. “Korrupsion aktiv i gjyqtarit, prokurorit dhe i funksionarëve të tjerë të drejtësisë”.
7. “Korrupsion aktiv në sektorin privat”, i kryer në bashkëpunim.
8. “Shpërdorim detyre”.
9. “Pastrimi i produkteve të veprës penale ose veprimtarisë kriminale”

SPAK zbardh atentatin ndaj Ardian Çapjas, qitësi ishte snajperisti Prek Kodra

Bazuar në bisedat e aplikacionit të enkriptuar “Sky Ecc”, SPAK ka zbardhur dhe atentatin ndaj Ardian Çapja, i regjistruar më 8 Qershor të vitit 2020. Në atë kohën Çapja u qëllua me armë zjarri snajper nga një distancë e largët, teksa ai ndodhej në oborrin e vilës së tij në Elbasan, të monitoruar në cdo cep nga kamerat, teksa qitësi dyshohet se ishte pozicionuar në kodrën e Krastës.

Çapja arriti që t’i shpëtojë atentatit, teksa mori një plumb në shpatullën e majtë, pranë zemrës. Në momentin që u rrëzua dhe ra në tokë, ai mori edhe një frakturë në kokë. Çapja u dërgua fillimisht në spitalin e Elbasanit dhe më pas u transportua në Tiranë te “Trauma”, ku iu nënshtrua një ndërhyrje kirurgjikale dhe arriti t’i shpëtonte plagës së marrë.

Nga operacioni i fundit i SPAK, mësohet se autori i dyshuar i këtij atentati ka qenë snajperisti Prekë Kodra, ndaj të cilit është lëshuar një urdhër-arresti, ndërsa porositës ka qenë grupi i Suel Çelës.

Prekë Kodra është shpallur në kërkim nga SPAK edhe në dy operacione të mëparshme të SPAK, teksa dyshohet se është një vrasës me pagesë i përfshirë në disa ngjarje kriminale në Shqipëri dhe në Kosovë.

Me origjinë nga fshati Shtoj i Ri i Shkodrës, Prek Kodra konsiderohet si një person me rrezikshmëri të lartë, i dyshuar edhe për një atentat të mundshëm ndaj kryeministrit të Kosovës, Albin Kurti në vitin 2021. Kjo u zbulua nga e mail-et e ish-drejtorit të Policisë së Shtetit, Gledis Nano, të cilat u nxorën në publik nga grupi i hakerave iranianë, pas hakerimit të institucioneve shtetërore.

Sipas dokumentit të Njësisë Kundër Terrorizmit, roli i Prek Kodrës në serinë e atentateve që kishin për qëllim destabilizimin politik të Kosovës, ishte ai i atentatorit/vrasësit. Ai përshkruhej si person që dinte se si të përdorte edhe armën e zjarrit snajper dhe dyshohej se ishte përfshirë në disa vrasje në Kosovë dhe Mal të Zi.

Sipas planit, fillimisht do të vritej një komandant i UÇK-së Ismet Haxha dhe më pas deputeti Xhavit Haliti. Një muaj pas vrasjes së deputetit të PDK-së, do të vritej edhe Albin Kurti për t’u dukur si akt hakmarrjeje.