Të përballur me mungesë të tregut të shitjes, shumë fermerë që kanë kultivuar pemë frutore mollë, e kanë prodhimin stok. Ylli Farruku nga fshati Grevë i Njësisë Administrative Melan në Dibër thotë se të gjithë prodhimin e ka të mbetur gjendje pasi nuk ka mundur dot ta shesë.
Ai tregon se kjo situatë e ka mërzitur shumë pasi është e përvitshme, ndërsa shprehet se asnjë subvencione nuk ka marrë nga qeveria. Mungesa e një ambienti frigoriferik për ta ruajtur prodhimin në mënyrë që ta shesë gradualisht, bën që shumë fermerë ta hedhin.
I gjendur në të njëjtën situatë është edhe fermeri tjetër Selim Suti i cili ka nisur prerjen e të gjitha pemëve frutore mollë. Ashtu siç ka bërë me qershiat, Selimi tregon se të njëjtën gjë po bën edhe me mollën pasi prej vitesh prodhimi i kalbet për shkak të mungesës së tregut të shitjes.
Fermerët e Dibrës kërkojnë që shteti të jetë rregullator i çmimeve të importit dhe produkteve të brendshme në mënyrë që këto të fundit të mos mbeten pa shitur.
