Pasi qëlloi disa herë me thikë bashkëmoshatarin Martin Cani, i cili ndërroi jetë në spital, autori i dyshuar i vrasjes u largua nga vendi i krimit.
Policia mundi të gjejë armën e krimit vetëm 5 ditë pas vrasjes, të cilin autori e kishte hedhur bashkë me çantën e shkollës në çatinë e një godine 1-katëshe në rrugën “Fadil Rada”, pas ATSH-së ose pranë Gjykatës së Apelit në Tiranë.
Burimet bëjnë me dije se brenda në çantë ishte thika me të cilën dyshohet se vrau Martin Canin, por celulari i autorit të mitur ende nuk është gjetur. Dyshohet se hedhja e çantës mbi çati është bërë nga vetë i mituri, pasi është larguar me vrap pas sherrit rreth 200 metër larg shkollës “Fan Noli”.
Çanta është gjetur në mënyrë rastësore nga banorë të zonës dhe sapo kanë konstatuar thikën, është njoftuar policia. Blutë pritet të verifikojnë kamerat e sigurisë në zonë për të parë nëse ka pasur ose jo bashkëpunëtorë të tjerë për ta ndihmuar për t’u larguar.
Ndërkohë, Shoqëria Civile dhe prindër kanë njoftuar sërish protestë për vrasjen e Martinit të hënën në orën 17:00. Nëse nuk do të merren masa për plotësimin e kërkesave që kanë paraqitur, ku mes tyre është edhe dorëheqja e ministres së Arsimit, Ogerta Manastirliu, ata paralajmërojnë bojkot të mësimit.
