SHBA-të u njoftuan nga Rusia pak para sulmit të Moskës me një raketë balistike me rreze të mesme veprimi në qytetin ukrainas Dnipro, ka thënë një zyrtar amerikan.
“SHBA u njoftua paraprakisht para nisjes së sulmit, përmes kanaleve të reduktimit të rrezikut bërthamor,” tha zyrtari.
Ukraina tha se Rusia gjuajti një lloj të ri rakete në qytetin e Dnipro-s këtë mëngjes dhe se ajo duket të jetë një raketë balistike ndërkontinentale (ICBM) – një armë e projektuar për sulme bërthamore në distanca të gjata.
Tre zyrtarë amerikanë më pas thanë se nuk ishte një ICBM, por një raketë balistike me rreze të mesme veprimi që ka një rreze më të vogël.
Më pas, Vladimir Putin tha në një fjalim televiziv se Rusia nisi një sulm me raketa balistike me rreze të mesme veprimi në një objekt ushtarak ukrainas në përgjigje të sulmeve të fundit të Ukrainës me me armë perëndimore me rreze të gjatë.
Pavarësisht nga klasifikimi i tij, sulmi i fundit thekson tensionet në rritje të shpejtë në ditët e fundit.
