Agjencia e Mbikëqyrjes Policore zbatuar vendimin e Gjykatës së Gjirokastrës për të kryer ndalimin e dy efektivë të Policisë, një doganieri dhe dy shtetasve të tjerë, teksa është shpallur në kërkim një efektiv tjetër policie.
Ky i fundit është efektivi Feim Onjea, me detyrë Trupë Shërbimi Operacional në forcën e posaçme Shqiponja, i dyshuar për veprat penale “Shpërdorim i detyrës” dhe “Shpërdorim i autoritetit policor” kryer në bashkëpunim.
Ky i fundit ndodhej në Drejtorinë e Policisë së Gjirokastrës në momentin kur i shkuan efektivët e AMP-së për ta arrestuar.
Siç shihet në videon e mëposhtme, ai sapo merr vesh se do të arrestohet, largohet me vrap nga godina e Policisë së Gjirokastrës dhe ende nuk është kapur.
.
Kujtojmë se në kuadër të këtij operacioni u arrestuan dhe 5 shtetasit:
- Kryekomisari Alfred Kondi, me detyrë Shef i Sektorit të Krimit të Organizuar në Policinë e Gjirokastrës, i dyshuar për veprat penale “Shpërdorim i detyrës” dhe “Shpërdorim i autoritetit policor” kryer në bashkëpunim.
- Nënkomisari Xhevit Dine, me detyrë Specialist në Seksionin e Inteligjencës dhe Arkivës Kriminale, i dyshuar për veprën penale “Shpërdorim i detyrës” kryer në bashkëpunim.
- Bledar Mustafaraj, me detyrë doganier, niveli C2 në degën doganore Kakavijë, i dyshuar për veprave penale “Falsifikim i dokumentave” dhe “Kontrabanda nga punonjës që lidhen me veprimtarinë doganore”.
- Ili Muho, i dyshuar për veprat penale “Kontrabanda me mallra të tjera” dhe “Falsifikim i vulave, i stampave ose i formularëve” kryer në bashkëpunim.
- Kleodor Kazo, i dyshuar për veprat penale “Kontrabanda me mallra të tjera” dhe “Falsifikim i vulave, i stampave ose i formularëve” kryer në bashkëpunim.
Sipas AMP-së, ata janë të përfshirë në trafikun e emigrantëve të paligjshëm, organizimit të paligjshëm të basteve sportive dhe kontrabandës së mallrave.
“Nga hetimet disa mujore me metoda speciale u dokumentua me prova ligjore përfshirja e shtetasve në veprën penale të trafikimit të emigrantëve të paligjshëm, favorizimin e shtetasve të ndryshëm në kontrabandimin e mallrave dhe organizimin e lojrave të fatit në formën e basteve sportive, me qëllim përfitimin në mënyrë të paligjshme të vlerave monetare.
Gjithashtu u provua se punonjësit e policisë duke shfrytëzuar funksionin organik dhe atributet që ju jep detyra, në periudha të ndryshme kanë ndikuar në lejimin e ushtrimit të aktiviteteve të paligjshme nga shtetas të ndryshëm.” – thuhet në njoftimin e AMP-së
Në kuadër të këtij operacioni është sekuestruar në cilësinë e provës materiale një automjet tip ML dhe katër aparate celular.
