Deputetja e PD-së, Albana Vokshi ka reaguar në lidhje me rezolutën e miratuar ditën e sotme organizata më prestigjioze e partive të qendrës dhe qendrës së djathtë në botë, IDC-CDI në lidhje me Shqipërinë.
Deputetja demokrate ishte e pranishme në sallë gjatë mbledhjes së samitit të Internacionales së Qendrës Demokratike në Kamboxhia dhe gtjatë fjalimit të mbajtur ajo adresoi situatën politike dhe sociale në Shqipëri
Përmes një postimi në rrjetet sociale, Vokshi shkruan se në këtë mbledhje janë adresuar problematikat kryesore të Shqipërisë dhe është treguar mbështetje për opozitën dhe përpjekjet e saj për demokraci dhe zgjedhje të lira e të ndershme.
Sipas Vokshit, rezoluta e miratuar dënon lidhje e regjimit të Edi Ramës me kartelet e drogës në Amerikën Latine, si dhe sulmin politik ndaj opozitës me burgosje dhe izolim të liderëve të saj.
Gjithashtu sipas saj, rezoluta nënvizon dhe nevojën për një drejtësi të pavarur që mbështet qytetarët dhe nuk përdoret si armë ndaj kundërshtarëve politikë, si dhe kërkeqën për një qeveri teknike. Deputetja demokrate thotë se IDC-CDI do të ndjekë me vëmendje zhvillimet në Shqipëri.
Postimi i plotë:
Rezolutë historike dhe mbështetje ndërkombëtare për demokracinë në Shqipëri!
Ditën e sotme, organizata më prestigjioze e partive të qendrës dhe qendrës së djathtë në botë, IDC-CDI, që bashkon 109 parti politike nga të gjitha kontinentet, ka miratuar një rezolutë që shënon një moment të veçantë për të ardhmen e vendit tonë. Në mbledhjen e Komitetit Ekzekutiv, zhvilluar në Siem Reap, Kamboxhia, janë adresuar problematikat kryesore të Shqipërisë dhe është treguar mbështetje për opozitën dhe përpjekjet e saj për demokraci dhe zgjedhje të lira e të ndershme.
Rezoluta dënon ashpër:
1️⃣ Lidhjet e rënda të regjimit të Edi Ramës me kartelet e drogës në Amerikën Latine, që kanë kthyer Shqipërinë në një lavatriçe gjigante të pastrimit të parave.
2️⃣ Sulmet politike ndaj opozitës dhe drejtuesve të saj, si izolimi i Kryetarit të PD-së, Prof. Dr. Sali Berisha, pa asnjë provë apo fakt; arrestimi i dhunshëm i Ilir Metës; proceset politike ndaj Fatmir Mediut dhe Ervin Salianjit; si dhe goditja e pamerituar ndaj Fredi Belerit.
3️⃣ Përpjekjet kurajoze të opozitës për zgjedhje të lira, ndershmëri institucionale dhe rikthimin e qeverisjes demokratike në Shqipëri.
Rezoluta nënvizon gjithashtu:
• Rëndësinë e luftës kundër krimit të organizuar dhe trafikut të drogës, duke i dhënë fund lidhjeve të krimit me pushtetin dhe votën.
• Nevojën për një drejtësi të pavarur që mbështet qytetarët dhe nuk përdoret si armë ndaj kundërshtarëve politikë.
• Kërkesën për një qeveri teknike, bazuar në modelin e Maqedonisë së Veriut, për të garantuar integritetin e zgjedhjeve të ardhshme.
IDC-CDI do të ndjekë me vëmendje zhvillimet në Shqipëri.
Të dashur qytetarë, ky është një moment që kërkon përpjekjen dhe bashkimin e të gjithëve ne. Ndryshimi është në duart tona dhe zgjedhjet e ardhshme janë shansi ynë për ta rikthyer Shqipërinë në shinat e ligjit, drejtësisë dhe shpresës.
Bashkë për të mirën e Shqipërisë!
