Janë zbardhur emrat e 17 personave të arrestuar nga Policia në kuadër të operacionit të koduar “USDT-1”, të cilët akuzohen se kryenin veprimtarinë e paligjshme të këmbimit të kundërligjshëm të parave “cash” në monedha virtuale dhe anasjelltas.
Burime bëjnë me dije se në pranga janë vënë shtetasit: Genci Sula, Riduan Bajrami, Arlin Kajo, Lidra Leka, Muahemd Saraci, Aldi Ruli, Arbëror Agastra, Spartak Gjoci, Armando Gjoci, Donaldo Demaj, Tedi Agastra, Frederik Sinanaj, Piro Verdhi, Dorian Valentin, Evis Sopi, Jonid Lazaj dhe Aurora Bregu.
Mbi 17 shtetasit e mësipërm rëndon akuza për veprën penale “Ushtrimi pa licencë i veprimtarive financiare” dhe “Fshehja e të ardhurave”.
Ndërkohë, Policia ka proceduar penalisht dhe shtetasin V. L., i akuzuar për veprën penale “Moskallëzimi i krimit”. Gjithashtu, janë shpallur në kërkim dhe dy shtetas të tjerë të implikuar në këtë veprimtari kriminale, me shtetësi të Maqedonisë së Veriut.
Policia raportoi se gjatë periudhës hetimore është mundësuar dokumentimi me prova i kësaj veprimtarie kriminale që kryhej individualisht, duke përdorur si mjete komunikimi rrjetet sociale, si dhe nëpërmjet disa subjekteve ekonomike, në Tiranë dhe në Shkodër.
“Si rezultat i hetimeve është provuar se 18 shtetasit e arrestuar, individualisht ose me cilësinë e administratorëve të subjekteve ekonomike në Tiranë dhe në Shkodër, këmbenin monedha virtuale ne para dhe anasjelltas, pa qenë të pajisur me licencën e nevojshme për kryerjen e kësaj veprimtarie. Nga kontrollet e kryera në 32 ambiente, janë sekuestruar me cilësinë e provës materiale: 13 pajisje kompjuterike, 27 celularë dhe rreth 750 mijë euro, që dyshohet se i shërbenin kësaj veprimtarie të jashtëligjshme.” – thuhej në njoftim.
Autoritetet bënë me dije se po vijojnë hetimet për të nxjerrë përpara përgjegjësisë penale, të gjithë shtetasit e implikuar në këtë veprimtari kriminale, të cilët kanë përdorur kriptomonedhat si mekanizma pagese nëpërmjet grupeve kriminale.
