Shpërthime të shumta u dëgjuan rreth kryeqytetit ukrainas të Kievit dhe qytete të tjera këtë të diel, teksa Rusia ndërmori valën më masive të sulmeve raketore që prej muajit gusht duke goditur infrastrukturën energjetike.
Prej javësh ukrainasit i druheshin një sulmi madhor në sistemin e energjisë, që do të shkaktonte dëme dhe ndërprerje të elektricitetit për të rritur presionin psikologjik, në prag të dimrit.
Sistemet e mbrojtjes ajrore u angazhuan për të rrëzuar dronët e nisur drejt Kievit, dhe një seri shpërthimesh të fuqishme u dëgjuan në qendër të qytetit.
Çatia e një godine banimi mori flakë si pasojë e rënies së mbetjeve të një droni në Kiev, dhe të paktën 2 persona u plagosën. Ndërprerje të energjisë u regjistruan në 3 rajone, përfshirë edhe kryeqytetin dhe rajonin e afërt të Dnipropetrovsk.
Në rajonin e Volin, në veriperëndim të Ukrainës, autoritetet thanë se infrastruktura energjetike kishte pësuar dëme të konsiderueshme, por pa dhënë shumë detaje.
Ndërsa në Mikolaiv, 2 persona u vranë gjatë një sulmi me dron gjatë natës. Shpërthimet tronditën edhe qytetin juglindor të Zaporizhias , Odesën dhe rajonet e Krivi Rih dhe Rivne.
Forcat ajrore të Ukrainës u bënë thirrje qytetarëve të qëndronin në vendstrehime.
Ministri i Jashtëm, Andri Sibiha, e cilësoi sulmin si përgjigjjen e vërtetë të Vladimir Putin ndaj liderëve të huaj me të cilët siç tha ka biseduar së fundmi.
Ai e quajti shefin e Kremlinit një kriminel lufte. Sulmi masiv, me raketa kruz, hipersonike dhe dronë, detyroi Poloninë fqinje, anëtare të NATO, të aktivizonte forcat ajrore brenda hapësirës së vet, si masë parandaluese./ A2CNN
