Kombëtarja shqiptare ka kryer sot stërvitjen e dytë për ndeshjen e Ligës së Kombeve kundër Çekisë.
Nën urdhrat e Sylvinhos janë vendosur 24 futbollistë. Ndryshe nga e hëna ku në stërvitje zbritën vetëm 13 nga 28 lojtarë të ftuar këtë të martë situata ishte ndryshe.
Përfundimisht përveç Gjimshitit, Kumbullës dhe Bares edhe Rey Manaj humbi grumbullimin për shkak dëmtimi, ndërsa nga 3 ftesat e fundit është paraqitur vetëm Arbnor Muja, ndërsa dy të tjerët Jon Mersinaj dhe Adrian Bajrami ende s’kanë mbërritur në Tiranë.
Bashkimi i tyre me pjesën tjetër të grupit do të ndodhë në stërvitjen e së mërkurës. Njëjtë si Mirlind Daku, i cili edhe pse ka mbërritur në qendrën e grumbullimit është stërvitur i vetëm në palestën e ekipit kombëtar për shkak të lodhjes nga udhëtimi i gjatë.
Sfida përballë Çekisë është e pesta në grupin e Ligës së Kombeve ku Shqipërisë 3 pikët i vlejnë jo vetëm për hakmarrjen pas humbjes 2-0 në Pragë, por edhe për të pretenduar vendin e parë.
