Policia e Shtetit ka publikuar listën me emrat e kandidatëve që garojnë për pozicionin “Shef Komisariati” në organizatën e uniformave blu.
Sipas njoftimit të autoriteteve, janë 290 efektivë që kanë shprehur interesin për t’u bërë drejtues në 44 komisariate të vendit.
Sipas ligjit, pas përfundimit të fazës së aplikimeve, Komisioni i Vlerësimit të Aplikimeve do të kryejë vlerësimin paraprak të aplikimeve, me qëllim verifikimin e plotësimit të kushteve ligjore nga kandidatët të cilët kanë shprehur interes për pozicionin “Shef Komisariati”.
Ky proces është ndjekur edhe me Drejtorin e Përgjithshëm të Policisë së Shtetit, si dhe për 12 drejtues të Drejtorive të Qarqeve në organizatën e uniformave blu. Por, procesi ka patur një mungesë të theksuar transparence se në ç’kushte është bazuar pikëzimi i kandidatëve.
