Boldnews.al denoncoi ditën e sotme masakrën që kompanitë e ndërtimit i shkaktojnë ambientit në Tiranë.
Më konkretisht bëhej fjalë për “PEPA GROUP”, kompania që ka fituar tenderin për ndërtimin e shkollës 9-vjeçare “Pjetër Budi”, e cila me shembjen e mureve apo objekteve të tjera, shkakton pluhur masiv që “pushton” të gjithë zonën për rreth dhe e thithin banorët e zonës dhe kalimtarët e rastit.
Dhe në këtë situatë kaq alarmante, duket se asnjë prej institucioneve nuk funksionon dhe nuk reagon, teksa kompanitë vazhdojnë të shkelin rregullat e mjedisit.
Më herët, Boldnews.al kontaktoi me drejtoreshën e Agjencisë Kombëtare të Mjedisit, Arta Dollani, e cila duket e pa interesuar për mjedisin pa dhënë një përgjigje konkrete, por vetëm se do njoftonte Policinë.
Gjithashtu, redaksia tentoi të merrte një reagim dhe nga ministrja e Turizmit, Mirela Kumbaro, e cila ka nën varësi institucionin e AKM-së, duke e vënë në dijeni dhe të pamjeve skandaloze, por deri më tani nuk kemi marrë një përgjigje prej saj, e cila duket në të njëjtën situatë me Dollanin.
Institucionet heshtin, ndërkohë që një pjesë e mirë e banorëve të Tiranës e thithën pluhurin e shkaktuar nga “PEPA GROUP”, e cila e bëri të vetën duke prishur objektin në shkollën “Pjetër Budi”.
Kryeministri Edi Rama i vendos synime vetes se do e futë Shqipërinë në BE në vitin 2027, por ky çdo ditë e më shumë vertetohet si një premtim bosh, kur në vendin tonë nuk funksionojnë as gjërat më bazike. Por, si prej tij dhe prej Kumbaros nuk mungojnë as premtimet boshe për “Shqipërinë turistike – Perlën e Ballkanit”, ku ndotja është masive.
