Kryeministri Edi Rama i ka besuar postin e prefektit të Qarkut të Fierit ish-deputetit socialist Arben Çuko. Ky i fundit do të zëvendësojë në atë post Mbarime Isufajn, e cila kishte më pak se katër muaj që ishte emëruar në këtë post.
Burime për mediat bëjnë me dije se Arben Çuko është prezantuar ditën e sotme si prefekti i ri i Qarkut të Fierit.
Arben Çuko ka qenë deputet i PS-së për zonën e Lushnjës nga viti 2009 deri në vitin 2017, teksa më pas u emëruar në krye të drejtorisë së Përgjithshme të Burgjeve.
Ai u arrestua gjatë operacionit “VOL-VO 4”, ku u godit grupi i Avdylajve, pasi nga përgjimet Çuko rezultoi se favorizoi në këmbim të ryshfetit një të dënuar për të lëvizur nga një burg në një tjetër.
Bëhej fjal për Olsi Karagjozin, një vrasës me pagesë që ndodhejt në burgun e Bradasheshit në Elbasan, teksa u transferua në një burg tjetër ku iu bë e mundur që i dënuari të mbante celular në qeli kundrejt shumave të ryshfetit 1500-3000 euro.
Çuko u arrestua më 21 tetor të vitit 2018, teksa ishte shkakruar nga detyra si Drejtor i Burgjeve në datë 3 shtator të vitit 2018 me urdhër të Ministres së Drejtësisë.
Në vitin 2020, Gjykata e Tiranës vendosi të pushojë përfundimisht çështjen ndaj ish-drejtorit të Përgjithshëm të Burgjeve, Arben Çuko. Më herët, akuza ndaj tij u zbut nga Gjykata e Krimeve të Rënda nga “korrupsion i zyrtarëve të lartë” në “moskallëzim krimi”.
Arben Çuko ka mbajtur dhe poste si komandant i Gardës së Republikës, këshilltar i presidentit të Kosovës për sigurinë dhe prej Qershorit të vitit 2023 ishte këshilltar i ministrit të Drejtësisë, Ulsi Manja.
Tashmë, Rama kanë vendosur që ta rikthejë sërish Arben Çukon duke i besuar drejtimin e qarkut të cilin e përfaqësoi në dy mandate në Kuvendin e Shqipërisë.
