Nga Boldnews.al
Institucionet publike janë vendosur në garë se kush e kush të shpenzojë më shumë fonde publike për ndërtimin e “Auto-Moto Parkun” e Elbasanit. Dhe, si në një garë shpejtësie, natyrisht përplasjet janë të pashmangshme.
Kështu ka ndodhur së fundmi me Fondin Shqiptar të Zhvillimit, të drejtuar nga Dritan Agolli dhe Drejtorinë e Shërbimit të Transportit Rrugor, me titullar Ilir Mëngra.
Në 18 Tetor të këtij viti, Fondi Shqiptar i Zhvillimit (FSHZH) shpalli tenderin me objekt “Ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit, Auto-Moto Park, në Bashkinë Elbasan Faza II. Ndërtimi i Tombinove”.
Fondi limit për këtë procedurë u përcaktua 137.515.514 lekë të reja (1.37 miliardë lekë të vjetra) ose afërisht 1.4 milionë euro.
Por, vetëm një javë pas shpalljes së tenderit, në 25 Tetor 2024, Fondi i Zhvillimit u detyrua ta anulojë këtë procedurë, pasi projekti mbivendosjen me një tjetër projekt, të hartuar nga Drejtoria e Shërbimit të Transportit Rrugor.
Pse u anulua tenderi
Njoftimi për anulimin e tenderit 1.4 milionë euro është publikuar së fundmi në Agjencinë e Prokurimit Publik (APP).
Fondi Shqiptar i Zhvillimit ka argumentuar se “nga informacioni i marrë këto ditë nga përfaqësuesit e Bashkisë Elbasan dhe përfaqësuesit e DPSHTRR, rezulton se, për Auto-Moto Parkun po zhvillon procedurë prokurimi edhe Drejtoria e Shërbimit të Transportit Rrugor e cila është në fazën përfundimtare të projektit të zbatimit dhe sipas tyre, janë bërë disa ndryshime në lidhje me planin e përgjithshëm të sistemimit dhe të funksionimit të tij”.
Në vijim, institucioni i drejtuar nga Dritan Agolli thotë se “Projekti i zbatimit të Auto-Moto Park po përgatitet nga studio ndërkombëtare dhe ka njoftuar përfituesit për disa ndryshime, të cilat afektojnë në ndërtimin e tombinos tip box betonarme 2*6*3 m, të parashikuar në procedurën me objekt: “Ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit, Auto-Moto Park, në Bashkinë Elbasan Faza II: Ndërtimi i Tombinos në Funksion të Auto-Moto Park”.
Për Fondin Shqiptar të Zhvillimit, “ndryshimet e propozuara nga studio projektuese sjellin si rrjedhojë ndryshime në seksionin e boxit betonarme dhe në kuotën referuar terrenit të Auto-Moto Parkut”.
Pas këtyre sqarimeve, Fondi Shqiptar i Zhvillimit ka vendosur anulimin e procedurës me vlerë 1.4 milionë euro, duke konfirmuar se, në procesin e shpenzimeve të larta, institucionet publike as nuk komunikojnë dhe as nuk koordinohen paraprakisht.
Miliardat për luks
Në Shkurt të vitit 2023, Drejtoria e Shërbimit të Transportit Rrugor shpalli fituesin për projektin e ndërtimit të “Auto-Moto Park” në Elbasan. Kompania fituese është austriakja “Test & Training International – ËURZ Design”.
Pas nisjes së projektit, nisën shpenzimet e miliarda lekëve, nga ana e Drejtorisë së Shërbimit të Transportit Rrugor për studimin e fizibilitetit për pistën dhe nga Fondi Shqiptar i Zhvillimit për aksesorët dhe rrugët lidhëse.
Disa muaj më parë, Drejtoria e Shërbimeve të Transportit rrugor tenderoi 17.3 milionë lekë për hartimin e Studimit të Fizibilitetit.
Ndërsa Fondi Shqiptar i Zhvillimit ka finalizuar të paktën katër procedura tenderuese, për një vlerë totale prej 1.667.854.625 (16.6 miliardë lekë të vjetra) ose rreth 17 milionë euro.
Këto katër procedura lidhen me ngritjen e strukturës mbështetëse në funksion të kompleksit multifunksional “Auto-Moto”.
Më konkretisht, fondi është shpenzuar për ndërtimin e rrugës “Gjergj Arianiti”; ndërtimi i aksesit turistik për rrugë biçikleta e shtigje këmbësorësh; për argjinaturën mbrojtëse të lumit Shkumbin; dhe zhvillimin e sektorëve të ndryshëm.
