Presidenti amerikan Joe Biden ka telefonuar presidentin e sapozgjedhur të 47-të të Shteteve të Bashkuara, Donald Trump, për ta uruar për fitoren e tij në zgjedhje.
Mediat amerikane raportojnë se Biden e ka ftuar Trump-in në Shtëpinë e Bardhë për të diskutuar kalimin e pushtetit, teksa stafi do të koordinojë një datë në të ardhmen, për takimin mes tyre.
Gjithashtu, Biden po planifikon t’i drejtohet kombit amerikan për rezultatet e zgjedhjeve presidenciale, të cilat do të kenë implikime të mprehta për pasardhësin e tij.
Biden mësohet se foli gjithashtu me Zëvendës Presidenten Kamala Harris, për ta uruar atë për fushatën e saj.
Më herët edhe kandidatja demokrate, Kamala Harris, e cila aktualisht mban postin e zëvendëspresidentes së SHBA, ka pranuar zyrtarisht humbjen dhe ka uruar presidentin e sapozgjedhur Donald Trump, për fitoren e tij.
Harris e ka telefonuar Trumpin për ta përgëzuar për fitoren, duke i shprehur urimet e saj dhe duke diskutuar rëndësinë e një kalimi paqësor të pushtetit dhe të një udhëheqësi që punon për të gjithë amerikanët.
