Donald Trump është në rrugën për t’u bërë president ii 47-të i Shteve të Bashkuara të Amerikës.
Liderët botërorë e kanë uruar, përmes mesazheve në rrjete sociale. Kryeministri i Mbretërisë së Bashkuar thotë se mezi pret të punojë me Trump.
“Mezi pres të punoj me ju në vitet në vijim”, thotë kryeministri i Mbretërisë së Bashkuar.
“Si aleatët më të afërt, ne qëndrojmë krah për krah në mbrojtje të vlerave tona të përbashkëta të lirisë, demokracisë dhe sipërmarrjes. Nga rritja dhe siguria te inovacioni dhe teknologjia, e di se marrëdhënia speciale MB-SHBA do të vazhdojë të përparojë në të dy anët e Atlantikut për vitet në vijim”, shkruan ai ndër të tjera.
Udhëheqësi francez Emmanuel Macron gjithashtu ka uruar Donald Trump për fitoren e tij të dukshme.
“Urime President Donald Trump,” tha Macron në frëngjisht në X.
“Gati për të punuar së bashku siç kemi bërë për katër vjet. Me bindjet tuaja dhe me të miat. Me respekt dhe ambicie. Për më shumë paqe dhe prosperitet.”
Edhe presidenti ukrainas, Volodymyr Zelensky, ka uruar Donald Trump për “fitoren mbresëlënëse”.
Zelensky tha se ai vlerësoi “angazhimin e Trump për qasjen ‘paqe përmes forcës’” ndaj çështjeve globale dhe se parimi mund të “sjell paqen e drejtë në Ukrainë”.
“Ne presim me padurim një epokë të një shteti të fortë të Shteteve të Bashkuara të Amerikës nën udhëheqjen vendimtare të Presidentit Trump,” tha ai.
Trump pritet të hartojë një kurs të ri për konfliktet e mëdha në Ukrainë dhe Lindjen e Mesme. Ai ka pohuar më parë se do t’i jepte fund luftës së Rusisë në Ukrainë nëse kthehej në Shtëpinë e Bardhë.
Sekretari i Përgjithshëm i NATO-s, Mark Rutte, i cili në një postim në rrjetin social “X” shkruan se udhëheqja e Trump do të jetë kyçe për ta mbajtur NATO-n të fortë.
“Sapo urova Donald Trumpin për zgjedhjen e tij si President i Shteteve të Bashkuara të Amerikës. Udhëheqja e tij do të jetë edhe një herë kyçe për ta mbajtur aleancën tonë të fortë. Mezi pres të punoj me të dhe të avancojmë paqen përmes NATO-s”, ka shkruar Rutte në platformën “X”.
