Një aksident i pazakontë automobilistik është regjistruar mbrëmjen e kësaj të hëne në hyrje të rrugës “Skënderbeu, në qendër të Sarandës.
Nga informacionet paraprake mësohet se një automjet, i cili po lëvizte në drejtim nga sheshi qendror i qytetit, ka humbur kontrollin për arsye ende të paqarta dhe ka përplasur 4 vazo dekorative që ndodheshin në anë të rrugës, duke shkaktuar dëmtimin e tyre.
Më tej, automjeti ka përplasur dhe një motor të parkuar në trotuar, duke i shkaktuar dëme të konsiderueshme edhe këtij mjeti.
Fatmirësisht nuk raportohet për persona të lënduar, teksa mësohet se automjeti është larguar nga vendngjarja menjëherë pas aksidentit, pa ndaluar për të parë dëmet e shkaktuara.
Policia ka mbërritur në vendin e ngjarjes dhe ka nisur hetimet për zbardhjen e rrethanave dhe autorit, teksa do verifikojë edhe pamjet e kamerave të sigurisë.
