Marc Marquez me Honda ka marrë “pole position” në pistën e Austin, në përfundim të provave zyrtare, të vlefshme për Çmimin e Madh të Amerikës, garë që zhvillohet sonte në mbrëmje (ora 21:00).
Një rezultat i pritshëm ky, pasi piloti spanjoll dominoi si dje ashtu edhe sot gjatë provave të lira, ndërkohë që dha kohën 2’03”188. Marquez fitoi duelin me patriotin e tij Jorge Lorenzo, i dyti me Yamaha, me vetëm 69 të mijtat më shumë.
Ndërsa i treti një tjetër pilot i Yamaha, Valentino Rossi, por që ishte gati gjysmë sekondi më i avashtë se Marquez. Praktikisht, në tri vendet e para janë sërish tri pilotët që edhe para një jave startuan garën nga vija e parë në Argjentinë.
Pas treshes pretendente për titull u rendit një Ducati, ai i Andrea Iannone, që la pas Maverik Vinales e Cal Crutchlow. Vetëm i shtati Andrea Dovizioso me Ducatin tjetër, ndërsa i teti u rendit Dani Pedrosa me Honda, duke zhgënjyer disi në provat e sotme.
Marquez shihet si pretendent për fitore edhe nesër, teksa e ka pistën e Austin si të preferuar e ku Honda gjithnjë ka dalë mirë. Gjithsesi, në pistë do të shihet zgjedhja e gomave që do të kryejnë pilotët, që pritet të jetë vendimtare për rezultatin e garës. Gara e Çmimit të Madh të Amerikës është prova e tretë sezonale e Moto GP.
