Janë zbardhur detaje të reja nga ngjarja e regjistruar në orët e para të mëngjesit të sotëm në Shkodër, ku u dogjën dy automjete.
Makinat që u përfshinë nga zjarri janë automjetet tip “Benz ML” dhe “Kiron Ssanyong”, teksa ngjarja ndodhi rreth orës 03:25, në lagjen “Kongresi i Përmetit”.
Burime për mediat bëjnë me dije se makinat janë në pronësi të shtetasit Sabaudin Hoxha dhe ishin parkuar pranë banesës së dhëndrit të tij shtetasit Ergys Lohja.
Dyshohet se ka qenë ky i fundit shënjestra e ngjarjes së regjistruar natën e kaluar dhe makinat mësohet se përdoreshin nga ky i fundit. Ergys Lohja punon si agjent krimesh në Komisariatin e Policisë së Shkodrës.
Makinat u përfshinë nga flakë masive, ku pavarësisht punës së forcave zjarrfikëse, ato u shkrumbuan thuajse totalisht, duke shkaktuar dëme të konsiderueshme materiale.
Nga hetimet paraprake dyshohet se kemi të bëjmë me një zjarrvënie të qëllimshme. Grupi hetimor po shqyrton provat dhe po mbledh dëshmi për të sqaruar motivet dhe autorët e mundshëm të këtij akti.
