Rodri shpallet fituesi i “Topit të Artë” për vitin 2024. Mesfushori spanjoll la pas në votime Vinicius Jr dhe Jude Bellingham.
28-vjeçari, futbollist i Manchester City-t në Premier League shpërblehet në mënyrën më të mirë të mundshme, për paraqitjet fantastike me klubin e tij dhe me kombëtaren e Spanjës.
Ai dha një kontribut të jashtëzakonshëm për City-n në fitimin e titullit rekord të katërt radhazi në Angli.
“Qytetarët” nuk humbën asnjë ndeshje në Premier League me Rodri në fushë sezonin e kaluar. Shifrat janë më të vërtetë të frikshme, sa i përket golave dhe asisteve (2023/2024), futbollisti është përfshirë në 17 gola.
Për Spanjën aktualisht kampione Europe, 28-vjeçari luajti 13 ndeshje në sezonin 2023/24, duke shënuar tre gola. Rodri u shpall edhe lojtari më i mirë i Europianit gjatë verës ku ngriti edhe trofeun me iberikët.
Ky është Topi i parë i Artë për Rodrin pas dy nominimesh, i cili u ngjit me paterica në skenë për të marrë trofeun prestigjioz, kjo pas një dëmtimi të rëndë që do e lërë atë jashtë për pjesën tjetër të sezonit.
Gjithashtu këtë mbrëmje u ndanë dhe çmime të tjera. Aitana Bonmati fitoi për të dytin vit radhazi “Topin e Artë” për Femra, me futbollisten e Barcelonës që shkëlqeu sezonin e kaluar.
Carlo Ancelotti u shpall “Trajneri më i Mirë”, ndërsa trofeu “Kopa” shkoi për Lamine Yamal, si lojtari më i mirë nën 21 vjeç. Sa i përket trofeut “Yashin” për portierin e vitit, fitues u shpall Emiliano Martinez. Real Madrid fitoi çmimin “Klubi më i Mirë për Meshkuj”, ndërsa Barcelona fitoi “Klubi më i Mirë për Femra”.
Çmimet e mbrëmjes:
Lojtari më i mirë nën moshën 21-vjeçare: Lamine Yamal (Barcelona).
Klubi më i mirë për femra: Barcelona
Klubi më i mirë për meshkuj: Real Madrid
Golashënuesit më të mirë: Harry Kane dhe Mbappe
Portieri më i mirë: Emiliano Martinez (Aston Villa).
Çmimi “Socrates”: Jennifer Hermoso
Trajneri i vitit: Ancelotti (Real Madrid)
“Topi i Artë” për femra: Aitana Bonmati
“Topi Artë” për meshkuj: Rodri
