Skënderbeu në volejboll ka arritur të marrë një fitore të dyfishtë ditën e sotme në kryeqytet, pasi si meshkujt, po ashtu edhe femrat kanë arritur të mposhtin Tiranën me rezultatin identik 2-3 me sete.
Fillimisht në parketin e sallës “Farie Hoti” zbritën ekipet e meshkujve, ku bardheblut e nisën mirë sfidën me rezultatin e pastër 25 me 18, teksa seti i dyti foli në favor të korçar që arritën të triumfonin me rezultatin 22-25.
Tirana arriti të fitonte setin e tretë me rezultatin 25-22, por ndërkohë dy setet e tjera u fituan nga korçarët e rrjetës 17-25 dhe 19-21. Siç duket dhe nga rezultati, seti i fundit ka qenë mjaft i luftuar, por që në fund triumfuan bardhekuqët dhe fituan ndeshjen me rezultatin e përgjithshëm 2-3 me sete.
Korçarët arrijnë të konfirmohen në vendin e dytë në kampionatin e meshkujve pas kësaj jave të shtatë që u hap të mërkurën me fitoren e Teutës kundër Elbasanit në shifrat 3-1, ndërsa do të mbyllet të shtunën me takimin Studenti-Vllaznia në orën 19:00 në “Asllan Rusi”.
Ndërkohë, pas meshkujve në parketin e sallës “Farie Hoti” zbritën vajzat, ku Skënderbeu arriti të merrte një fitore të “çmendur” me përmbysje përballë Tiranës, teksa vinte në kryeqytet me petkun e kampionit dhe mund të konsiderohej si një finale e parakohshme, duke iu referuar finales së sezonit të shkuar.
Dy setet e para u fituan nga vajzat bardheblu të Tiranës me rezultatet 25-22 dhe 25-21, por duket se kaq ishte fuqia e tyre, të cilat nuk arritën të merrnin dot dhe një set tjetër, për ta përmbyllur totalisht ndeshjen.
Tre setet e tjera folën totalisht në favor të korçareve të rrjetës, të cilët arritën të triumfonin me rezultatet 20-25, 16-25 dhe 7-5, duke përmysur rezultatin e përgjishëm në 2-3 me sete.
Me këtë fitore vajzat e Skënderbeut “blindojnë” vendin e parë me 7 fitore në po kaq ndeshje të luajtura.
