Gjatë tubimit të sotëm, kreu i PD-së, Sali Berisha deklaroi se takimet e deputetëve të kësaj force politike në Parlamentin Europian shënojnë fillimin e një dialogu intensiv ndërkombëtar të PD-së.
Sipas liderit demokrat, eurodeputetëve ditën e sotme iu është paraqitur një realitet shokues, i pabesueshëm dhe i paimagjinues për situatën në Shqipëri.
Gjithashtu, Berisha deklaroi se deputetët e PD-së do të zhvillojnë takime edhe në Kongresin dhe Senatin amerikan pas zgjedhjeve presidenciale në SHBA.
Gjithsesi, Berisha theksoi se pavarësisht ndihmës që do t’u japin ndërkombëtarët, sërish beteja është e tyre dhe i thirri shqiptarët që të marrin pjesë në protestën e 29 Tetorit.
Berisha: Unë gjej një rast të falenderoj të gjithë ata parlamentarë që pritën, dëgjuan me durim, me interes të madh deputetët e opozitës, të PD, realitetin shqiptar ashtu siç është dhe jo sipas propagandës së Edi Ramës. U paraqitën atyre me dokumente të pakundërshtueshme, një realitet shokues, të pabesueshëm, të paimagjinueshëm. Kjo shënon fillimin e një dialogu intensiv ndërkombëtar të PD-së. Kjo parti ka qenë dhe do të jetë gjithmonë lokomotivë e proceseve integruese. Për PD, integrimi i shqiptarëve në BE është interesi më madhor kombëtar, është e ardhmja e tyre më e shkëlqyer. Por ky proces do të jetë një proces që kalon në zbatimin dhe respektimin e ligjeve të shtetit ligjor, sigurisë juridike dhe kushtetutës, të drejtave dhe lirive të individit, zgjedhjeve të lira, garës së hapur.
Dialogun me partnerët tanë e kemi detyrim dhe u garantoj se do ta përmbushim me seriozitetin dhe dinjitetin më të madh. Por askush të mos harrojë se çfarë do ndihme të na japin ne ata, përballjen me Edi Ramën e kemi ne. Është detyra jonë, është radha jonë, është beteja jonë. Përfaqësuesit tanë do të vazhdojnë me intensitet takimet në parlamentet e vendeve kryesore. Pas zgjedhjeve padiskutim që do të shkojnë edhe pranë Kongresit dhe Senatit të SHBA, për të paraqitur realitetin e vërtetë të Shqipërisë. Po miq! Sepse kanë hedhur mbi këtë realitet, tonelata gënjeshtra, gënjeshtra, gënjeshtra. Pra, ne do të bëjmë gjithçka, por dialogun me qytetarët shqiptarë nuk e zëvendëson asgjë. Por guximin e qytetarëve shqiptarë nuk e zëvendëson asgjë.
Por revoltën e qytetarëve shqiptarë nuk e zëvendëson asgjë. Por atdhedashurinë e qytetarëve shqiptarë për Shqipërinë nuk e zëvendëson asgjë. Por betejën e tyre për dinjitet nuk e zëvendëson asgjë. Betejën e tyre për votën e lirë nuk e zëvendëson asgjë. Betejën e tyre për ndryshim, rotacion nuk e zëvendëson asgjë. Ndaj dhe ju ftoj të ngrihemi në betejë të vazhdueshme. Në datën 29 Shqipëria në duart e opozitës, Shqipëria kundër Edi Ramës dhe regjimit të tij. Shqipëria drejt fitores.
