Komisioneri Shtetëror i Zgjedhjeve, Ilirjan Celibashi përmes një letre drejtuar partive politike, ngre shqetësimet se koha për të çuar dhe për të marrë zarfin me votën e emigrantëve është e pamjaftueshme.
Ai thotë se pas konsultimeve, të gjithë operatorët e shërbimit postar ndërkufitar i kanë bërë me dije se koha që partitë duhet për dërgimin e fletëve të votimit nga Shqipëria, ne adresat përkatëse të votuesve jashtë vendit është 45 ditë, ose minimumi 30 ditë, por që do ta vinte në pasiguri dhe vështirësi procesin.
Ndërkohë, afatet për regjistrimin e subjekteve zgjedhore dhe kandidateve, se bashku me kohën për prodhimin e fletëve te votimit datojnë rreth 10-12 ditë përpara datës së zgjedhjeve
“Të gjithë ofruesit e shërbimit postar ndërkufitar bënë me dije se koha që ju duhet për dërgimin e fletëve të votimit nga Shqipëria, në adresat përkatëse te votuesve jashtë vendit është 45 dite. Koha më e shkurtër, por qe do ta vinte gjithsesi në vështirësi/pasiguri procesin është 30 ditë. Sikurse ju e dini afatet për regjistrimin e subjekteve zgjedhore dhe kandidateve, se bashku me kohën për prodhimin e fletëve te votimit datojnë rreth 10-12 ditë përpara datës së zgjedhjeve.
Në çdo rast jo më parë se 30 ditë përpara. Të gjithë operatorët përfshi edhe atë publik vlerësojnë se është e pamundur dërgimi i fletëve të votimit jashtë dhe kthimi i tyre në Shqipëri në një kohë më të shkurtër se 30 – 45 ditë. Praktikat e vendeve të tjera ku disa prej këtyre operatoreve janë angazhuar në votimin nga jashtë konfirmojnë afatin e dërgimit dhe te kthimit te fletëve të votimit nga jashtë, në një periudhe kohore jo më të pakët se 45 ditë.” – thuhet në letrën e Celibashit.
Sipas Komisionerit Shtetëror të Zgjedhjeve, duhet të përjashtohet kategorikisht dërgimi i fletëve të votimit nga votuesi drejt KQZ-së me postë të thjeshtë, pasi nuk ka gjurmin të asnjë lloji gjatë rrugëtimit, teksa sugjeron që dërgesat të bëhen vetëm me postë “expres”.
Celibashi rekomandon që si dërgimi i fletëve nga ana e KQZ, po ashtu edhe kthimi i fletëve nga ana e votuesve të bëhet me të njëjtën kompani postare të kontraktuar nga KQZ dhe të shmanget posta e thjeshtë edhe për shkak të vonesave.
Ndërkohë, Komisioni Qendror i Zgjedhjeve në mbledhjen e sotme miratoi me 5 vota pro rregullat për regjistrimin e votuesve nga jashtë Shqipërisë dhe listat e zgjedhësve për zgjedhjet parlamentare të vitit 2025.
Sipas rregullores së miratuar, çdo qytetar shqiptar, i cili jeton jashtë dhe kërkon të marrë pjesë në zgjedhjet e përgjithshme parlamentare duhet të regjistrohet në Platformën Elektronike të Regjistrimit (PER) të paktën 68 ditë përpara datës së votimeve.
Sipas KQZ-së, zgjedhësit do të duhet ta shkarkojnë dhe të krijojnë një llogari të tyre, e cila është e aksesueshme dhe pa pagesë. Sipas Kodit të ri Zgjedhor, vota e personave që jetojnë jashtë, llogaritet në qarkun ku ai/ajo ka jetuar përpara se të largohej nga Shqipëria.
