Armando Broja duket se ka mbyllur vitin 2024 me Kombëtaren shqiptare. Sulmuesi shqiptar nuk po rikuperohet në kohë nga dëmtimi në thembrën e akilit, duke zgjatur kështu qëndrimin jashtë fushave të lojës.
Situatë e konfirmuar nga mjeku i skuadrës së Everton, që shton se 23-vjeçari ende nuk është gati për tu bashkuar në stërvitje. Lajm aspak i mirë për Brojën, i cili synonte që tek kjo skuadër të gjente ritmin pas thuajse dy vitesh të dominuara nga problemet fizike.
Broja u bashkua me Everton në merkaton e verës në formulën e huazimit nga Chelsea, me opsion blerjen e kartonit në fund të sezonit. 23-vjeçari gjendet në infermieri që prej gushtit të këtij viti, duke qenë edhe jashtë për sfidat e muajit Shtator dhe Tetor në Ligën e Kombeve.
Shkalla e lartë e dëmtimit shuan shpresat për një rikthim të tij me kombëtaren kuqezi për dy sfidat e fundit të kompeticionit në muajin nëntor.
