Tashmë ushtarakët mund të emërohen me detyra të larta në radhët e Policisë së Shtetit.
Vendimi është marrë në mbledhjen e Këshillit të Ministrave të enjten e kaluar (10 tetor), teksa ky projekt është nisur që në kohën kur Ministria e Brendshme drejtohej nga ushtaraku Sandër Lleshaj.
Ky vendim i Qeverisë për rekrutimin e forcave ushtarake në radhët e uniformave blu vjen vetëm pak ditë para hapjes së garës për të zgjedhur 12 drejtorët e Drejtorive të Qarqeve në Policinë e Shtetit, duke iu lejuar kështu që ata të marrin pjesë në konkurs.
Siç përcaktohet edhe në tabelën e mëposhtme për ekuivalentimin e gradave, një kolonel ushtrie merr gradën drejtues i lartë apo drejtues i parë dhe mund të konkurrojë për drejtor në Drejtoritë e Policisë së Qarkut.
Gjithashtu sipas VKM-së së miratuar, efektivët që duan të largohen nga organizata e unfirmave blu mund të shkojnë në Ushtri, tek Policia e Burgjeve, ose shërbimi zjarrfikës, duke ruajtur pagën dhe gradën.
Propozues të këtij ndryshimi rezulton se janë 3 ministrat e linjës: ministri i Drejtësisë Ulsi Manja, ministri i Brendshëm Ervin Hoxha dhe ministri i Mbrojtjes Pirro Vengu.
Ndërsa qeveria e ka argumentuar këtë barazim të gradave si më poshtë:
“Ekuivalentimin e gradave të Forcave të Armatosura të Republikës së Shqipërisë, sipas ligjit nr. 59/2014, “Për karrierën ushtarake në Forcat e Armatosura të Republikës së Shqipërisë”, të ndryshuar, të Policisë së Shtetit, sipas ligjit nr. 82/2024, “Për Policinë e Shtetit”, të Gardës së Republikës, sipas ligjit nr. 33/2021, “Për Gardën e Republikës së Shqipërisë”, të ndryshuar, dhe të Shërbimit të Mbrojtjes nga Zjarri dhe Shpëtimin, sipas ligjit nr. 152/2015, “Për Shërbimin e Mbrojtjes nga Zjarri dhe Shpëtimin”, me gradat e Policisë së Burgjeve, sipas ligjit nr. 80/2020, “Për Policinë e Burgjeve”, të ndryshuar, sipas lidhjes nr. 1, që i bashkëlidhet këtij vendimi dhe është pjesë përbërëse e tij.2. Për ekuivalentimin me gradën “nënkomisar”pranë Policisë së Burgjeve, kandidati duhet të zotërojë një diplomë të arsimit të lartë, të lëshuar nga institucionet e arsimit të lartë, të licencuara dhe të akredituara sipas dispozitave në fuqi në kohën e lëshimit të diplomës ose të zotërojë një diplomë të të njëjtit cikël, të lëshuar nga një institucion i huaj i arsimit të lartë, të njohur e të njësuar pranë ministrisë përgjegjëse për arsimin.3. Ngarkohen Ministria e Drejtësisë, Ministria e Brendshme dhe Ministria e Mbrojtjes për zbatimin e këtij vendimi”.
