47-vjeçari Ilir Nukaj dhunoi barbarisht një çift të moshuarish ditën e djeshme në Povelcë të Fierit. Ai u paraqit në dyqanin e të moshuarve për të blerë alkool, ndërsa 80-vjeçari nuk ka pranuar t’ia shesë, pasi njihej si person problematik. Pas kësaj, Nukaj ka goditur me grushte në pjesën e kokës, shtetasin Namik Rustemi, 80 vjeç dhe bashkëshorten e tij, shtetasen A.R, 77 vjeçe.
Fqinja e të moshuarve tregon se fillimisht dëgjoi zhurmë dhe doli menjëherë për të parë se çfarë po ndodhte teksa ka parë 80-vjeçarin të shtrirë përtokë të mbuluar me njolla gjaku.
Ndërsa nusja e djalit tregon se fillimisht i thanë se kishte pësuar aksident për të mos i trembur, ndërsa më pas mësuan për ngjarjen. Ajo pohon se autori ka qenë në gjendje të dehur, ndërsa thekson se edhe pse ka qënë person problematik në zonë, me çiftin e të moshuarve nuk ka patur asnjëherë më parë probleme.
I moshuari Namik Rustemi vijon të mbetet në intubim në Spitalin Rajonal të Fierit, kurse bashkëshortja e tij ndodhet nën kujdesin e mjekëve.
