Kreu i grupit parlamentar të PD-së, Gazment Bardhi i është përgjigjur kreut të grupit të PS-së, Niko Peleshi, i cili e konsideroi si tejkalim të çdo kufiri cënimin fizik përplasjen e Xhelal Mziut me Milva Ekonomin.
Bardhi shprehet se nuk ka ndodhur kurrë që dhunuesit ta shesin veten për viktima, denoncuesit si kriminelë apo kriminelët si shtetarë.
Sipas tij, mazhoranca urdhëron Gardën që të dhunojnë deputetët e opozitës dhe më pas deputetët e PS keqpërdoren për të provokuar kolegët e tyre. Bardhi tha më tej se me dhunuesit dhe me antiligjin nuk mund të ketë dialog, teksa iu bëri thirrje deputetëve të mazhorancës që të mos keqpërdoret kundër deputetëve të opozitës dhe të mos i nënshtrohen metodave autoritare të Edi Ramës kundër opozitës.
“Kurrë s’ka ndodhur që dhunuesit ta shesin veten si viktima; trafikantët si shenjtor e denoncuesit si kriminel; të korruptuarit si deputetë të nderuar dhe deputetët e nderuar si të padenjë për të ushtruar mandatin e tyre; apo kriminelët si shtetar që po bëjnë shtet.
Urdhërojnë Gardën të dhunojnë opozitën dhe keqpërdorin deputetet e PS për të provokuar kolegët e tyre që janë në të drejtën e vet për tu mos u penguar pa ligj të ushtrojnë mandatin që i kanë dhënë qytetarët, dhe më pas thonë se duhet dialog. Me dhunuesit nuk mund të ketë dialog, me antiligjin nuk mund të bisedosh, me provokuesit nuk mund të arsyetosh. Rezistenca dhe mosnënshtrimi është i vetmi mjet që i ka mbetur deputetëve të opozitës.
Apeloj çdo koleg të mazhorancës që privatisht e cilëson Edi Ramën si Saddam Hussein shqiptar, që të mos keqpërdoret kundër deputetëve të opozitës dhe të mos i nënshtrohen metodave autoritare të Edi Ramës kundër opozitës. Në të kundërt, shumë shpejt do jetë radha e tyre të jenë viktima të Saddam Hussein shqiptar – Edi Ramës. Prej kohësh Edi Rama dhe metodat e tij antidemokratike kundër qytetarëve dhe opozitës janë shndërruar në një rrezik kombëtar”, shprehet Bardhi.
