Për rreth 3 orë ka zgjatur protesta e sotme e opozitës, ku ka patur marshim drejt institucioneve shtetërore, duke i konsideruar ato si institucione të krimit.
Ka qenë Sekretari i Përgjithshëm i PD-së, Flamur Noka, ai i cili ka njoftuar mbylljen e protestës dhe deklaroi se mazhoranca sot po dridhet nga frika.
Ai i bëri thirrje kreut të qeverisë, Edi Rama që të plotësojë kërkesat e qytetarëve dhe Qeverinë teknike, ndryshe nuk do të ketë paqe për të. Noka nuk dha detaje se si do të vijojë më tej aksioni opozitar.
Noka: Ishte dita e pare që mosbindja civile zbriti ne Tiranë. Regjimi narkos i tërbuar sot mori një mesaz. Mesazhi ishte jepi zgjidhje kërkesës së qytetarëve, jepi zgjidhje Qeverisë teknike, ndryshe narkosi në pushtet nuk do të ketë paqe asnjëherë. Sot e kuptuan që beteja me qytetarët nuk fitohet me gaz e dhunë.
Qytetarët sot i dhanë një leksion ne do të jemi këtu të vazhdojmë mosbindjen civile, deri sa kërkesat tona të plotësohen. Të formohet qeveria teknike. Sot startuan nga parlamenti në rrugë për çdo hap tjetër do ju njoftojmë. Do jemi në mosbindje civile. Sot janë duke u dridhur, janë të tërbuar sepse forca e qytetarëve i ka kallur datën. Mobilim me mijëra forca policore kanë rrethuar bunkerin e Surrelit. Nuk ndalohet as me gaz revolta e qytetarëve. Kjo është revolt, jo protestë, është hap i parë i mosbindjes civile. Faleminderit qytetarëve që iu bashkuan thirrjes sonë.
