Gjykata e Apelit ka lënë në fuqi dënimin e Gjykatës së Tiranës për Alda Klosin dhe Rozeta e Havier Dobi.
Alda Klosi, ish-shefja e kabinetit të ish-ministrit të Shtetit për Rindërtimin dhe Programin e Reformave, Arben Ahmetaj, u dënua me 2 vjet e 6 muaj burgim për fshehje pasurie në 19 mars të këtij vitit.
Ajo përfitoi nga gjykimi i shkurtuar dhe u dënua përfundimisht me 1.8 vite burg.
Ndërsa fajtorë u deklaruan edhe Rozeta Dobin dhe Havier Dobin, nënë e birpër akuzën vjedhjes me pasoja të rënda në bashkëpunim dhe u dënuan përkatësisht me 7 vjet dhe 5 vjet burg.
Si u zbulua shuma e parave të vjedhura në shtëpinë e Kolsit?
Ngjarja për të cilën u arrestuan nënë e bir, Rozeta dhe Havier Dobi e ka zanafillën në dhjetor 2022 kur ish-zyrtarja e lartë, Alda Klosi kallëzoi në polici për vjedhjen e qindra mijëra eurove në banesë në rrugën e Kosovarëve në Tiranë. Në janar 2023-t policia arrestoi Rozeta Dobin dhe Havier Dobin, nënë e bir, nën akuzën e vjedhjes pasi në shtëpinë e tyre u gjet 404 800 euro, 8500 dollarë dhe aksesorë floriri, të cilat i ishin fshehur në tubin e aspirimit të banesës së tyre.
Ndërsa Havierit iu sekuestruan dy makina. Vetë Alda Klosi kishte bërë denoncimin për vjedhjen e 120 mijë eurove, 30 mijë dollarë dhe bizhuterive. Pas arrestimit pastruesja ‘e penduar’ e drejtësisë tha se 400 mijë eurot i mori në shtëpinë e Alda Klosit. Një muaj më pas, në shkurt 2023 u krye arrestimi i ish-zyrtares e cila vijoi të mohonte se shuma e parave që u gjet në tubin e aspirimit nuk i përkisnin asaj edhe pse Rozeta Dobi tregoi se paratë ishin marrë aty!
