Në fillim sipër, më pas nën një tren dhe në fund një tjetër hap drejt titullit. Kjo ishte nata e çmendur e juventinëve pas dy ndeshjeve për t’u harruar kundër Real-it dhe Napolit, por që sot e shohin vetën sërish protagonist.
“Ishte një mbrëmje e bukur në futboll mes dy skuadrave që janë përballur në mënyrë të hapur. Duhet që t’i fitojmë të gjitha, të dy trofetë. Në pjesën e parë luajtëm mirë, ishim më agresivë. Më pas patëm rënie dhe kaluam nën Interin, më pas bëmë një lojë të çmendur duke fituar në frymën e fundit. Duhet t’iu bëj komplimente djemve. Ishte një hap shumë i rëndësishëm për të fituar titullin”, tha tekniku Massimiliano Allegri pas fitores së çmendur që bëri Juventus kundër Interit në fundin e takimit në San Siro.
Më pas tekniku i bardhezinjve foli edhe për arbitrin Orsato, i cili i dha karton të kuq Vecino-s në pjesën e parë duke e lënë Interin me një lojtar më pak, por pasi pa sistemin VAR. Ndërkohë që pas golit të avantazhit, në fund i është dashur që të lërë dhe vetë fushën.
“Orsato arbitroi shumë mirë. Ndeshjet në Itali gjykohen dhe luhen në mënyrën e drejtë. Orstao është një nga më të mirët dhe ishte sot në lartësinë e duhur, në respekt edhe të ndeshjes. Por, në fund diferencën në lojë e bëjnë futbollistët”.
Higuain – Juventus kalon vështirësinë “San Siro” falë golit të Higuain, i cili e çoi rezultatin në 2-3 pikërisht në minutën e fundit të ndeshjes. Pas kësaj fitoreje, e cila e bën skuadrën bardhezi që të mbajë ritmin kundër Napoli-t në garën për trofeun e Serie A, sulmuesi argjentinas u shpreh: “Ky është futbolli, ndeshjen e shkuar e humbëm në minutën e fundit, këtë herë shënuam ne në fund. Ky do të jetë dhe titulli i shtatë për ne, diçka e pabesueshme, do të luajmë deri në fund. Mungojnë dhe tre ndeshje dhe Kupa e Italisë, kjo ishte thelbësore për ne. Ata kanë bërë një ndeshje të madhe, Icardi është lojtar i madh, ka bërë një gol të bukur edhe pse në fushë ishin dhjetë vetë”..
