Deputetët e Partisë Demokratike duket se kanë vendosur që të bojkotojë komisionet parlamentare, përveç Komisionit për Çështjet Europiane, pas burgosjes së deputetit Ervin Salianji, duke e konsideruar si një vendim politik.
Komisionit për Çështjet Europiane pritet të mblidhet rreth orës 09:00, ku deputetët e PD-së, Jorida Tabaku dhe Edi Paloka do të paraqesin qëndrimin e PD-së. Ndërsa në komisionet e tjera deputetët e PD_së nuk do të shkojnë.
Ndërkohë, grupi parlamentar i PD-së do të mblidhet sërish rreth mesditës për të vendosur se çfarë do të bëjnë në seancën plenare që do të mblidhet në orën 17:00.
Në rendin e ditës në seancën në Kuvend janë vetëm diskutimet e problematikave të hasura me zgjedhësit, pas javës së gjelbër.
Mbetet të shihet nëse do të ketë një seancë normale apo jo, pasi demokratët kanë paralajmëruar kaos në Kuvend.
Gjithashtu, PD ka thirrur edhe një protestë kombëtare më 7 tetor në orën 18:00, ku do të bllokojë aksiet kryesore.
