Kryesia e Partisë Demokratike ka vendosur se do të zhvillojë një protestë kombëtare në datën 6 tetor.
Vendimi u mor në përfundim të mbledhjes urgjente të zhvilluar mbrëmjen e sotme pas dënimit politik të deputetit të PD-së Ervin Salianji.
Tema kryesore e mbledhjes urgjente kanë qenë hapat e ardhshëm të opozitës pas dënimit të Salianjit.
Sekretari i Përgjithshëm i PD-së, Flamur Noka ka propozuar protesta në çdo qark, bllokim të rrugëve, porteve dhe aeroporteve. Gjithashtu ai ka propozuar dhe bllokim të universiteteve.
Berisha iu kërkoi anëtarëve të Kryesisë së PD-së që të lënë çdo gjë dhe t’i përkushtohen nga mëngjesi deri në darkë betejës për mobilizim, duke theksuar se do t’i përgjigjen dhëmbë për dhëmbë regjimit.
“Qëndrimi ynë do të jetë një opozitë me të madh e të vogël, me të gjithë atë që guxon, në protestë, protestë. Qëndrimi ynë do të jetë, përqafimi i modelit të rezistencës në rrugë, në shesh, të përballjes dhëmbë për dhëmbë, si objektivi më madhor absolut, me këtë regjim, që nuk njeh kushtetutë. Me këtë regjim që bën gjithçka të mos ketë opozitë”, tha ndër të tjera Berisha.
Nënkryetari i PD-së, Agron Gjekmarkaj ka propozuar që grupi parlamentar demokrat të shkojnë të gjithë në Bruksel, e t’i informojnë për derexhenë ku ka rënë Shqipëria e dhunën politike ndaj lidershipit të opozitës.
Gjekmarkaj shprehet se miti i drejtësisë së re ra si gur për të shtypur kokën e opozitës.
“Të bëjmë diçka simbolike që nesër, sepse po t’i bëhej PS-së kjo gjë kur ishte në opozitë, të arrestohej një deputet, do kishte zier rrjeti, do kishin vënë kujën militantët, do qanin ndërkombëtarët me lot për faqe! Ndërsa për ne heshtje, gajret, kini besim tek drejtësia.
Më dhemb nga ana njerëzore dënimi i Ervin Salianjit se e kam mik po edhe politikisht ka simbolikën e vet! Nesër nga ne duhet një akt simbolik sëpaku si grup, si kryesi si parti për një standart që bie për liritë që kufizohen për mesazhin mafioz që marrim.
Sot secili nga ne ka thënë që ishte dënim politik, pra për fat keq miti i drejtësisë së re ra, po ra si gur për të shtypur kokën e opozitës.
Ne jemi ende shumë të vakët me ndërkombëtarët…më shumë se protestë Ramës i dhemb kur reagojnë gazetat, shtypi, ndërkombëtarët. Ndaj ta përdorimim edhe këtë formë të rëndësishme jo si protestë, se nuk kemi pse protestojmë para institucioneve të Europës, por si grup parlamentar të shkojmë të gjithë në Bruksel, e t’i informojmë për derexhenë ku ka rënë Shqipëria e dhunën politike ndaj lidershipit të opozitës e kudo tjetër, si grup, ta bëjmë një lajm, lajmin që duhet, në mediat ndërkombëtare, atë që çka po ndodh me ne këtu, me përfaqësuesit e gjysmës së Shqipërisë nën pranga.
Protesta po të çdo tipi por jo në rreth izolacionist ato duhet të marrin frymarrje ndërkombëtare! Duhet te jemi kreativ e të bëjme gjithçka duhet e njerëzit duan.”-tha Gjekmarkaj.
