Pas tre ndeshjeve të para të fazës së 1/16-ve të Kupës së Italisë të zhvilluara të martën sonte ka vijuar programi i këtij kompeticioni, ku janë zhvilluar edhe dy përballje të tjera.
Më konkretisht Cesena dhe Udinese kanë arritur të sigurojnë fitoret e radhës, duke siguruar në këtë mënyrë kalimin në raundin e 1/8-ve.
Kështu, në “Stadio Romeo Anconetani”, Cesena e Kristjan Shpendit ka arritur një fitore të madhe duke mundur minimalisht, 1-0, vendasit e Pisa me golin e vetëm të sfidës që erdhi në minutën e 54’-të, nga Celia, ndërsa për “bomberin” shqiptar pati vetëm rreth 20 minuta në pjesën e dytë, teksa e nisi sfidën nga stoli.
Në krahun tjetër, në “Stadio Friuli”, vendasit e Udinese kanë fituar me rezultatin e thellë, 3-1 përballë skuadrës së Salernitana me treshen Bijol, Lucca e Ekkelenkamp që shënuan nga një gol në minutat 20’, 44’ e 47’, për të nxjerrë “të pavlefshëm” golin e Simy.
Ndërkaq, në fazën e 1/8-ve, Cesena do të ndeshet me “Zikaltërit” e Atalanta, ndërsa Udinese me ata të Inter.
