Një tjetër klub i Serisë A do të bjerë në duart e pronarëve amerikanë. Bëhet fjalë për Udinezen, e cila i përket prej 39 vitesh familjes Poco dhe kjo shënon një ndryshim të rëndësishëm në futbollin italian.
Familja në fjalë kishte shtuar pronësinë e klubeve në kampionate të ndryshme dukë marrë edhe Uotford në Angli. Por me sa duket ajo ka vendosur të shkëputet nga klubi në Itali, me marrëveshjen që do të finalizohet në ditët në vijim.
Xhino Poco, ka qenë ai që është marrë me të gjitha çështjet e klubit në vitet e fundit dhe është përfshirë në mënyrë direkte në negociata me një kompani amerikane e cila mbështetej financiarisht nga një fond në Nju Jork.
Përflitet për një shifër rreth 150 milionë euro për kalimin e pjesës më të madhe të aksioneve të klubit. Familja Poco gjithsesi do të ketë në pronësi një pjesë të aksioneve, por jo kuotën kontrolluese të tij.
Para kësaj shitje të klubit, Xhino Poco është vënë në lëvizje për shitjen edhe të tre lojtarëve që kanë treg: Solet, Luka dhe Bizhol, për të sjellë rreth 70 milionë euro të tjera në arkat e tij. Më pas do të jenë aksionerët e rinj ata me të cilët do të planifikohet strategjia për sezonin e ardhshëm.
