Prokuroria e Posaçme (SPAK) ka kërkuar pushimin e çështjes së sherrit të regjistruar në Kuvend mes deputetit të PD-së, Bledion Nallbatit dhe deputetit të PS-së, Vullnet Sinaj.
Kujtojmë se për këtë çështje ishte ish-kreu i grupit parlamentar të PS-së, Bledar Çuçi, ai që dorëzoi i pari kallëzim penal në SPAK për veprën penale “goditje për shkak të detyrës”, teksa më pas edhe grupi parlamentar i PD-së dorëzoi kallëzim në SPAK për të njëjtën vepër penale.
SPAK argumenton se nuk vërtetohet ekzistenca e faktit tipik, atij të goditjes për shkak të detyrës, qoftë nga ana e shtetasit Bledion Nallbati, apo qoftë nga ana e shtetasit Vullnet Sina. Kërkesa i është dërguar GJKKO më 16 shtator.
Përplasja fizike mes deputetëve Nallbati dhe Sinajt, ndodhi gjatë seancës plenare të 30 tetorit 2023, teksa opozita po përpiqej të bllokonte punimet e Parlamentit në vazhdimësi të protestave për ngritjen e komisioneve hetimore.
Teksa Sinaj ishte duke folur deputeti Nallbati që ndodhej aty pranë shkoi dhe i fiku mikrofonin. Incidenti bëri që dy deputetët të përfshiheshin në përplasje fizike. Ishte garda dhe kolegët e tjerë të parlamentit ata të cilët qetësuan situatën dhe ndaluan përshkallëzimin e konfliktit.
Pas përleshjes deputeti demokrat, Bledion Nallbati u përjashtua nga seanca plenare.
