Ish-kryedemokrati Lulzim Basha, gjatë një interviste televizive, ka deklaruar se grupimi që ai drejton do të kandidojë në zgjedhjet e ardhshme me listë të plotë prej 140 kandidatësh dhe se vetë ai do të jetë pjesë e listës së hapur.
Tashmë i mbetur pa parti, Basha la të nënkuptohet se do të futet në koalicion me partitë të tjera. Më tej, Basha tha se, brenda javëve të ardhshme një emër jo i vogël kandidatësh do të bëhen publikë dhe pjesë e tyre janë edhe nga partitë e Harkut Opozitar Euroatlantikë.
“Jemi në fazën e përfundimit e listës tonë të kandidatëve për deputetë. Besoj që brenda ditëve të ardhshme, javëve të ardhshme, një emër jo i vogël kandidatësh do të bëhen publikë. Disa prej tyre kanë nisur tashmë dhe punën në terren. Natyrisht, ky është një proces që po ndodh në bashkëpunim edhe me partitë e Harkut Opozitar Euroatlantik, sepse do të jetë një listë e konsoliduar.
Konsensusi i deritanishëm i Kolegjit të Kryetarëve, i Kryesisë së Partisë edhe i Këshillit Kombëtar, por që do të marrë formë përfundimtare së shpejti, është që të shtyjmë përpara me rekursin, me ankimimin që kemi bërë në Gjykatën Kushtetuese, kundër mbylljes së listave nga Edi Rama dhe Sali Berisha..
Në çdo rast do të konkurrojmë me lista të hapura. Pra përmes lëvizjeve tona do të pamundësojmë listën e mbyllur të Demokratëve Euroatlantikë, të Harkut Opozitar Euroatlantik dhe do të garojmë me 140 kandidatë në lista të hapura. Unë vetë do të jem në listën e hapur dhe renditja do të jetë alfabetike.”, tha Basha për “Top News”.
