Sali Berisha akuzoi kryeministrin Edi Rama se po komploton kundër Kosovës me Presidentin serb, Aleksandar Vuçiç, gjatë vizitës në Nju-Jork për të marrë pjesë në Samitin e Organizatës së Kombeve të Bashkuara.
“Rekordet e këqija, rekordet e zeza janë ato me të cilat garon e paraqitet sot Shqipëria, kurse derdimeni, balozi i krimit, kreu i meduzës, thur komplote të tjera në OKB kundër Kosovës me padronin e tij, Aleksandër Vuçiç. Ndaj dhe ftoj qytetarët të ngrihemi në betejë të pandalshme, betejë pa kthim gjer në krijimin e qeverisë teknike, për zgjedhje të lira. Është radha jonë, është fitorja jonë”, tha Berisha në fjalimin që mbajti para mbështetësve.
Kryetari i PD shtoi se Shqipëria sot po garon vetëm me rekorde të këqija. “Njeriu që kreu gjenocid dhe largoi rreth 40% të shqiptarëve në 11 vite. Njeriu që me vjedhjet e tij, i zhyti shqiptarët çdo vit e më thellë në varfëri. Njeriu që me vjedhjet e tij, i bëri shqiptarët nga qytetarët më të mirë paguar në rajon, në qytetarët me rrogat më të ulëta në rajon. Njeriu që dënoi qindra e mijëra të rinj të zonave rurale me mesatare, vetëm e vetëm të largohen jashtë shtetit. Njeriu që rrënoi arsimin me shpejtësi të rrufeshme, duke siguruar rënien më të madhe në botë me 68 pikë, sa asnjë vend tjetër i planetit në 8 vite, të nxënësve tanë në matematikë”, e cilësoi Berisha kryeministrin Rama.
