Seanca e sotme plenare ka nisur me 1 minutë heshtje në nder të ish-deputetit demokrat Gerti Bogdani, i cili u përcoll ditën e sotme për në banesën e fundit.
Kryeparlamentarja Elisa Spiropali në fjalën e saj para deputetëve tha se largimi i parakohshëm nga jeta të Gerti Bogdanit do ti dhembë familjarëve, të afërmve, miqve dhe kujdo që e ka njohur.
“Ishte një politikan me integritet të madh, që shërbeu me përkushtim në qeverisjen vendore në Tiranë, por edhe në dy legjislatura në Kuvendin e Shqipërisë. Gerti Bogdani do të mbahet mend si njeriu serioz, fjalëmatur, qytetar, ekselent në çdo pikëpamje. Dhe kështu do të mbetet në kujtesën tonë, në kujtesën e çdo qytetari”, tha Spiropali.
Deputetët e Partisë Demokratike pas nisjes së seancës janë larguar nga salla e Kuvendit, ashtu siç kishin lajmëruar se do të anulonin çdo aktivitet partiak në të gjithë vendin.
Ndërkohë mazhoranca ka vijuar me rendin e ditës, kur një ndër pikat më të rëndësishme është ajo që ka të bëjë me studentët e Universitetit të Mjekësisë, konkretisht, projektligji “Për një shtesë dhe disa ndryshime në ligjin nr. 60/2023 “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme” në institucione publike të arsimit të lartë”.
